الشاعر مهيب عدلى (75 ترنيمة )

١- (ياللي حياة الروح في رضاك
رافع نفسي وباترجاك)٢
كل سلام النفس معاك
(وعينيَّ مرفوعة لعلاك)٢

القرار- (وأسكن في مراحمك وأتهنى
وفي ضعفي عليَّ بتتأنى
طلة وجهك أنا باستنى
ولقاك في سماك أنا باتمنى)٢

٢- (ياللي كل غنايا في جودك
سندة قلبي تكون في وعودك)٢
كل جبال تتشال بوجودك
(شايف راحتي في ضي سرورك)٢

٣- (ياللي روحي رايحة إليك
ونسايم عمري في إيديك)٢
شوقي يا ربي إني أرضيك
(وأعيش غربتي شاهد ليك)٢

١- (ينابيع بركاتك ما بتنشفش والصعبة معاك ما بتصعبش
وبفيض إحسانك ما بتمنعش والقلب بوعدك ما بيضعفش)٢

القرار- (بإيديك تشفي كل الجروح ونسيم فرح معك بيفوح
في حضورك كل الحزن يروح أفراح وياك في ملء الروح)٢

٢- (وكلنا نطلب تسمع لينا من كل ضيقاتنا بتتجينا
بأنات الروح بتشفع فينا خيرك أضعاف بتعطينا)٢

٣- (ولو تتزلزل الجبال ده وجودك يمحي كل محال
ولو في يوم رجانا مال بتنجني وتحيي بكل آمال)٢

١- (أنا هارمي بذور كلمتك على كل أرض وكل قلب
وجوابها ييجي بنعمتك مليان بكل الرجا والحب)٢

القرار- (والنبتة تكبر وتكبر وثمار للمجد تعود
بإيمان هاستنى وأنظر والخير ملوش حدود)٢
(والخير)٣ ملوش حدود

٢- (ولا مني الفضل والقوة في خير كتير غطى وزاد
كل اتكالي عليه هو إلهي سندي رب الحصاد)٢

٣- (وأفضل سهران وبكل يقين تصنع عجايب وبغِنى
تشفي المجروح ويا الحزين وتملى ليالينا بغُنى)٢

القرار- (أحلى كلام أشبع بيه هو كلامك لما ألاقيه
شهد لحلقي شفائي فيه جوا في قلبي أنا مخبيه)٢

١- (خليني أتلذذ بيك وأفرح دايماً بكلامك
وتفرحني بعمل إيديك وتفيض ربي بسلامك)٢

٢- (ده سلاحي وبيه أحارب وعدوي دايماً مغلوب
بالنعمة تلاقي نجاة وبآيات من جوا المكتوب)٢

٣- (دربي وفي كل يوم أعيشلك وأعلن أعمالك
حقك فيَّ يعلى يدوم والمجد يرجع لجلالك)٢

١- (ماتخليش لإيمانك حدود
امشي بقوة عدي السدود)٢
ده ثباتك في حفظ العهود
(ممسوك في إيد القدير)٢

القرار- (اتشدد وقوم بانتصار
بركات ليك في الانتظار)٢
تشهد عن إلهك باختبار
(بإلهك كل التدابير)٢

٢- (لا يوقف قدامك إنسان
وعدي ليك فيه كل الضمان)٢
أنا معاك بطول الزمان
(بكلمة أقولها فيصير)٢

٣- (فيه أراضي للامتلاك
دوس والنصرة في اللي فداك)٢
والروح اللي ساكن جواك
(هايقودك بطول المسير)٢

١- (فاكر لما ضعت وبعدت كمان وتهت
وسبت بيت أبوك حتى أصحابك خانوك)٢
(مين اللي دوَّر عليك وبشوق كان مستنيك)٢
(وبالأحضان لاقاك وردك ليه بحنان)٢

٢- (فاكر لما لاقيت الكل سابوك وحيد
وفي ضعفك حسيت يسوع عنك بعيد)٢
(مين اللي حس بظروفك ورفعك رغم خوفك)٢
(شدّد إيدك قواك وملا قلبك أمان)٢

٣- (فاكر لما لاقاك عند المية حيران
وأملك في الملاك وعينيك على الإنسان)٢
(مين اللي بدل حالك وجدد كل آمالك)٢
(رغم أحمالك خلاك رافع راسك فرحان)٢

١- أوقات باحس بإني طير طاير في الفضا
مرات باحس إني حزين في برد الشتا
وكتير باحس إني مخلوق وعمره انقضى
وقليل باحس بإني طفل وعمره ابتدا

القرار- وتتوه المعاني وأفضل أعاني
ومالقاش إجابة إلا في كلامك
وتحيي الأماني وتيجي بأغاني
ويغمرني سيدي نبع سلامك
(تكفيك نعمتي)٣ فيها الكفاية

٢- أوقات باحس بإني نسو وباعدي السدود
مرات باحس بخطوتي منعاها القيود
وكتير باحس بلمستك من غير حدود
وقليل باحس بضحكتي فوق الخدود

٣- أوقات باحس بقلبي في بحر الحياة غريق
مرات باحس بإني فوق ضعفي حر وطليق
وكتير باحس إن المية تحتي زي الطريق
وقليل باحس إنك جنبي زي الرفيق

١- (في كل يوم تصنع محال لما عينيَّ أرفعها ليك
ولو الظلام حواليَّ طال تشرق بنورك وأنا بين إيديك)٢

القرار- (وأمسك من تاني إيدك وأراضي بإيمان هاملكها
شوق قلبي أعلن تمجيدك واختبارات وياك هاعيشها)٢

٢- (ولما قلبي من الخوف يدوب ونور شموعي بينطفي
تيجي بسلامك في المكتوب تحيي الرجا وقلبي يتشفي)٢

٣- (مديون لك على الدوام في كل خطوة بالمس إيديك
قلبي بوعودك مليان سلام بخطاوي ثابتة ليوم ما أجيلك)٢

١- (ياللي بتشفي الروح من خطاياها بالغفران
تلمسها وتشفيها تبرئها بالإيمان)٢
(وتقوم من كسرتها وتبدأ فرحتها)٢
من ضعفها تسندها (وتملاها بأمان)٢

القرار- (هللويا هللويا أقامني وأحياني
هللويا هللويا أهتف له بأغاني)٢

٢- (ياللي تنادي الروح ومن القبر بتحييها
من أبواب الموت ترفعها وتنجيها)٢
(يا سر الحياة مصدر كل رجاء)٢
باختبارات أنا هاعلن (عنك وهاحكيها)٢

٣- (ياللي معاك الروح بتغنيلك بالهتاف
وتحيا في سلامك أبداً ما في يوم هاتخاف)٢
(فايض ليك كلامي بارفع ليك أنغامي)٢
أنا هاستنى مجيئك (ولحظة الاختطاف)٢

١- (ما أحلاها سنيني اللي تمر وإنت عزايا وساندني
فيها تحلي كل المر وتبدل نوحي وأغني)٢

القرار- (واليوم اللي أعيشه معاك تملاني بأفراح الروح
وأتهنى بطلة رؤياك وضمان خير والحزن يروح)٢

٢- (ما أحلاها الغنوة اللي بتيجي وسط الليل وبعد بكا
تمسح دمعي وتمسك إيدي وصباحي مليان برجا)٢

٣- (ما أحلاه قلبي لما يرفرف من الفرحة ويرنم لك
ونسايم الرضا لما تهفهف حواليّ يشرق مجدك)٢