كورال أطفال الراعي (27 ترنيمة )

1- أنا حمامة لوني جميل ريشي أبيض وطويل
كنت عايشة في فلك كبير مع إخواتي العصافير

القرار - كان (يا ماكان)3 كان في حمامة عايشة زمان
جوه فلك ضخم كبير مع إخواتها العصافير

2- جه في يوم نوح البار قال مين فيكم يا شطار
يخرج ويجيب الأخبار ومايخفش من الأخطار

3- طرت من الشباك قوام وماشوفتش أي إنسان
الميه في كل مكان لا زرع ولا شجر كمان

4- بعد مدة من الأيام كانوا سبعة بالتمام
خرجت أبص بالعيون وجبت معايا غصن زيتون
وبعد أسبوع كمان الأرض نشفت بالتمام
والزرع فى كل مكان أبتدى يرجع زي زمان

5- خرج نوح وأنا طرت كمان وشفت الدنيا زي زمان
وقوس قزح مليان ألوان علامة على خلاص الإنسان

١- في عيد ميلادك يا ربي المليك يا ريتك تقبل مني هديتي
و هديتي يا ربي حبي ليك قلبي الصغير ما يساع فرحتي

القرار- في عيد ميلادك نطلب ودادك إحنا أولادك ربي يسوع
نحمل سماتك نحفظ آياتك ونعيش حياتك ربي يسوع

٢- زي الرعاة ما جم رحبوا بيك إحنا كمان جينا نسلم عليك
و نقدم طاعتنا وحبنا ليك فرحتنا تكبر كل ما نرضيك

٣- شرفت يا ربي الصغيرين لأنك لما جيت للعالمين
جيت لنا صغير وأحلى منك مين يا ريتك تسكن في قلبي آمين

٤- إحنا عارفين ليه يا ربي انت جيت جيت علشان تغفر كل ذنبنا
و ترفع ذل الخطية المميت وحدك تستاهل كل حبنا

1- لما ياربي تفتح قلبي راح أصليلك وأنا مرتاح
وأفهم على طول كل كلامك (يملا حياتي في كل صباح)2

2- في إنجيلك أقرأ كلامك قبل النوم صوتك يحكيلي
ازاي عاشوا كل ولادك (سر خلودهم هو دليلي)2

3- وأقرأ كمان ازاي قوتهم جات من عندك وسط الموت
من صلواتهم ومحبتهم (أعرف أصليلك مظبوط)2

4- في قداسك أسمع أبونا بيصليلك علشان غلطاتي
صوتك يا يسوع أنا سامعه (راح أكرس لك كل حياتي)2

5- في الأجبية كمان أنا فاكر كل حياتك طول اليوم
حاسس يا إلهي بحمايتك (من صحياني لغاية النوم)2

القرار – (عمرها ما هاتكون قدام الناس دي حياتي مع ربنا أسرار
وماحدش هايعرفها أبداً وراح تكبر دايماً باستمرار)2

1- لو تدي واحد محتاج تضرب بوق قدامك ليه
عايز الناس كلها تشوفك تيجي عليك وعليه
لو على الأرض أخدت الأُجرة في السما راح تاخد إيه
يا مسيحي لو مسكين وعايز تعطف عليه
يبقى شمالك ماتعرفشي يمينك هاتعمل إيه
ده أبوك هو اللي بيشوفك تدي الفقير في أيديه

2- أدخل بيتك يلا بسرعة وأقفل بابك جوه عليك
خلي صلاتك في الخفاء ارفع لإلهك أيديك
وأقف اتكلم يلا معاه ده يسوع هايفرح بيك
لما تسيب الدنيا بحالها للسما توجه عينيك
مش مهم هاتقول إيه هو عارفك ساكن فيك
ده أبوك اللي بيسمعك وقدام الناس يجازيك

3- أما الصوم ده بيكون في الخفاء هو كمان
أوعى في يوم لما تصوم تعمل من نفسك تعبان
علشان الناس ينبسطوا وقدامهم صايم تبان
لكن أنت وأنت صايم أوعى تبقى في يوم كسلان
أغسل وشك يالا وقوم اعمل خير يا إنسان
ده أبوك هو اللي يشوفك وقدام الناس هاتبان

1-بابا نويل بابا نويل هاييجي هنا
حزر فزر يا ترى هايجيب إيه لنا
يلا نفرح يالا نرنم أنت وأنا
أجمل يوم اللي فيه اتولد ربنا

2-كل ما ييجي بابا نويل بعد ما بانام
بافتكر حكاية جميلة حصلت زمان
طفل اتولد في هدوء ومن غير كلام
في مذود معمول للبقر ومش للإنسان

3-الطفل ده ربي يسوع اتولد لنا
هي دي أجمل هدية جاية م السما
هانحافظ دايماً عليها جوه قلبنا
سامعين صوته وكلامه يملى عقلنا

1- حبك ليَّ يارب في كل زمان بيحوّطني زي سور عظيم
أتسند عليه وأبقى فرحان وأفضل جنبه مطَّمِّن وسليم

2- مهما حصلي أنا مش زعلان ولا بافكر بكرة ايه هايكون
لو كان فيه تفاصيل أو كُتر كلام برضه كلامك هو اللي مضمون

3- نفسي أشكرك يا إله الكون ياللي مليت قلبي فرحة وسلام
عمري ما هازعل أو هابقى مهموم طول ما حياتي ف إيدين الحنّان

4- أي خطوة ليَّ في أي مكان أرجعلك وأطلب منك بإيمان
انت أبويا وانت وعدت كمان ترشدني وتخليني في أمان

5- رافعلك صلواتي صبح وليل سامع صوتك ليَّ في الإنجيل
بيطَّمِّني وهو ليَّ دليل إن عمري معاك يفضل جميل

ربنا يسوع هو كل حياتنا
وعارفين إنه ساكن في قلبنا
وماشي في كل خطوة جنبنا
بيفرحنا وبكلامه يقولنا
(كونوا قديسين لأني أنا قدوس)3
(بطرس الأولى16:1)2