1- (لو دمعك على خدك مُر والخوف طول ليله
ماعدتش الأخبار بتسر ولا حبيب تشكي له)2
كل غالي راح وانضر ومافيش حد بديله
(فوق كل الأخطار لينا إله جبار)2
هو الحب اللي يعزيك من قلبك نادي له
2- (مهما تكون السكة طويلة مليانة أشواك
مابقاش عندك قوة وحيلة والأيام تعباك)2
ومش قادر وحدك ع الشيلة ومافيش إيد سانداك
(سلم كل ضيقاتك للي في إيده حياتك)2
هو الرب اللي بيحميك وبعطفه بيرعاك
3- (ما تشكيش للناس أتعابك دول هايعيّروك
دول كانوا بيجوا على بابك علشان يترجوك)2
واللي مفكرهم أحبابك هما اللي خانوك
(سلم كل جروحك للي يشفي روحك)2
هو الأب اللي يواسيك لما الناس ينسوك
