انت الحل (8 ترنيمة )

مش هاحكي أبداً عالكسرة وإلهي ده إله النصرة
ومعاه تحلى ظروفي المرة وحياتي بتفيض أنهار (٢)

القرار- مش هانظر تاني للماضي ده عيني مرفوعة ع الفادي
وهاحيا بثبات مش عادي لو عديت أنا وسط النار (٢)

ولا هاسمح تاني لأزمة تملا حياتي ضعف وعتمة
وإن مرّ على حياتي ضلمة إلهي يخلق لي نهار (٢)

ولو ما بإيدي إلا عصاية هامدها وإلهي رجايا
وعدوي لو ماشي ورايا بنصرة راح أعدي بحار (٢)

1- (لا معايا لا فضة ولا دهب أوزع ع الناس حسنات
ده القلب وياك ذهب وغمرته بفيض بركات)2

القرار- (ده اللي باركني بكل البركات في الأرض و السماويات
قادر يصنع أكتر وأكتر ويعوض عن كل ما فات)2

2- (لا بإيدي سيف ولا ماسك رمح اجري واحارب بيه جليات
ده أنا حامل سلاح الروح أقدر أهزم بيه قوات)2

3- (ولا ناظر مستني سحابة على أرض تنزّل خيرات
ده أنا في النعمة ليَّ إجابة رفعاني في كل الأوقات)2

إنت الحل لو حتى ميزان الكون ده كله في لحظة اختل
إنت الحل وكسرت بنفسك شوكة الموت والعدو اتذل (٢)
إنت الحل في وقت الصعب بتسند لو رجلينا تزل
إنت الحل ولكل مشاكل وأمور صعبة عندك حل (٢)
إنت الحل بترعى في أصعب وقت لو الموت كان له ظل
إنت الحل وبترفعنا فوق أكتافك وعلينا تطل (٢)
إنت الحل للمحروم واللي من طول انتظاره مل
إنت الحل ووسط البحر بتهدي اللي شراعه ضل (٢)
إنت الحل لما الكل في لحظة يفارق ولا يفضل خل
إنت الحل بتيجي بنورك لما ظلام الليل بيحل (٢)
إنت الحل بتجاوب كل سؤال إزاي أو إمتى وهل؟
إنت الحل لو من حوالينا شفنا الخير عمال بيقل (٢)

1- (ومفيش صعب إلا معاك ويعدي والموج العالي قدامك بيهدّي
وقت الصعاب ألقاك يا إلهي سندي لما أصرخ نجّيني يا ربي)2

القرار- (ده كل اللي معاك سيدي يهون وهياج الريح يبقى سكون)2
وبتحفظني جوه عينيك وتصون وسلامك بيطمِّن قلبي

2- (ولا فيه ألم إلا ومعاه بركات بالشكر بتُعلم ليك الطلبات
و بتعزية الروح بتعدي أزمات وتعديني من فوق صعبي)2
3- (ولا بدخل حرب إلا وعيني عليك والغلبة باسمك والنصرة دي فيك
وطول ما إيديَّ ماسكة في إيديك وسط الضلمة تنور دربي)2

ولا تنسى دمعة سالت من عيون مليانة جرح وألم
ولا حزن ساكن في جفون وبدّله فرح ونغم(٢)

القرار- ومهما طال الليل من بعده صبح يبان
ورجايا فيه دليل عايش أنا بالإيمان

ولا تغفل عني أبداً عينيك ولا بنام لو البحر علينا هاج
وبتيجي في الوقت التمام وبتوفي كل احتياج(٢)

ولا وقفت قدامك سدود إنت القدير وبتصنع من عدم المحال
سلطانك من غير حدود وأمامك هدوء الجبال(٢)

لسه فيه شمس من بعيد طالعة وراها نسمة بتهفهف (٢)
وشايف نصرتي في صليب ربي فوق راية بترفرف

القرار- وباعلنها ومش هايأس وبلحني راح أعزفها
وبقلبي هاغنيها وبصوتي هارددها (٢)

لسه فيه شمس لو ليلي عاني وفوق موجي أنا هامشي (٢)
وشايف إلهي جاي عالمية بيقولي ماتخفشِ

لسه في شمس شمس نصرتنا وعالية عالية لفوق (٢)
ورافع جناحات النسر وبارنم ومالي قلبي الشوق

لسه في شمس جاية ورا غيمة تشوفها عيني كل صباح (٢)
ونسايم رضا على ذبيحة لإلهي وبها قلبي ارتاح

1- (مديون بعمري ليك يلي بدمك شريته
وحياتي مضمونة فيك وقلبي بحبك سبيته)2

القرار- (ده الكل منك وليك وبتدي بفيض غناك
عايش و رجايا فيك ضامن مكان في سماك)2
ضامن مكان في سماك

2- (مديون بكل يوم غامرني حبك وجودك
وأفراحي بيك تدوم و سندتي بوعودك)2
3- (مديون بكل خطاوي مشيتها وانت راعيَّ
خليتني إنسان سماوي مستني مجيء فاديَّ)2

1- (مش هانكسر لو كل مساند الأرض اتهدت
ولا هانحني لو كل أبواب قدامي اتسدت)2

القرار- (طول ما الروح مرفوعة لفوق وغامرني ربي بحب وشوق
هافضل ثابت أنا في مكاني هو الصخرة وهو ضماني)2

2- (مش هانكسر قدام ظروف مُرّة تعطلني
ولا هانحني و مشيئتك انت يا رب مشيئتي)2
3- (مش هانكسر ولا يملى كياني أبداً يأس
ولا هانحني و هافرد جناحاتي تحت الشمس)2