هاستنى (12 ترنيمة )

١- (إلهي رب الأرباب وقلوب ملوك في إيديه
مين يقدر يقف قدامه فيه إيه مايقدرش عليه)٢
دي جبال بتدوب قدامه
وبحار بيشقها
الريح يسمع كلامه
وقيود بيفكها

القرار- (إزاي أنا ممكن أخاف وربي محاوطني
إزاي أكون زعلان وإلهي جنبي)٢

٢- (إلهي لحزني بيحزن وشايل كل همي
وبيسمع من غير ما أتكلم كل صرخة في قلبي)٢
دي دموع عيني مسحها
أوجاعي عني شال
ده بيمحي كل ضلمة
ويبدلها بجمال

‎١- إنت سلامي في وسط حربي
‎إنت ترسي وملجأي الحصين
‎إنت رجائي في عز ليلي
‎كلامك نور وسراج للطريق

‎القرار- ‎غيرك ماليش يا سيدي
‎في حبك مافيش زيك يا ربي
‎باجري عليك وأترمي في حضنك
‎وبسلام تملى قلبي

‎٢- إنت عزائي في وسط ضيقي
‎تمسح دموعي وتفرح قلبي
‎إنت طبيبي شافي جروحي
‎غافر ذنوبي حامل أوجاعي

‎٣- إنت صديقي طول حياتي
‎إنت راعيَّ أبويا ومرشدي
‎ماشي معايا طول الرحلة
‎إيدك في إيديَّ عمرك ما هاتسيبني

اللي مات عشان يحييني
إزاي أخاف على نفسي معاه؟
واللي شال عقابي عني
إزاي أختار غيره نجاة؟
إزاي أنام قلقان
أو ماحسش بالأمان؟
اللي حبني أكتر من حياته
فيه الضمان.. فيه الضمان

عشان اللي اتحب حب كامل
مش مفروض يكون قلقان
اللي وهب حياته فدايا
أكيد عمري معاه في أمان
وعشان حبك غمر حياتي
الخوف مابقالهوش مكان
موتك على الصليب بدالي
عرفني إني معاك متصان

١- (املك في القلوب علّي صوتك فينا
نوّر العيون وبروحك جدد فينا)٢

القرار- اخلق حياة تشهد عن إله عظيم زيك يا الله

٢- (قدِّس أوانينا واعكس مجدك فينا
نبني في ملكوتك مشيئتك تمم بينا)٢
٣- (املانا بسلطانك تصنع عجايب بينا
ترسلنا فعلة لحصادك ونفوس تتجدد بينا)٢

١- (مش مستني حاجة مني عشان تحبني
مش مستني أحسِّن نفسي عشان تقبلني
مش مستغرب ضعفي وفشلي
مش يائس من فكري وجهلي
وأنا في بعدي عنك خلصتني)٢

القرار- (بتحبني وحبك ثابت ليَّ
غفرت لي وإديتني حياة أبدية)٢

٢- (مش مستني لما أغلط تيجي تعايرني
ده أنت إيديك ممدودة ليَّ وجاهزة ترفعني
مهما بعدت عنك ربي لسة بتغفر ليَّ ذنبي
وترد نفسي وتهديني)٢

وبداية جديدة أعيشها معاك.. مليانة بخيرك وغناك
ولا حاجة تفصلني عن رحمتك

١- (الله ليه الكلمة إلهي ليه السلطان
في وعوده صادق
أمين طول الأزمان)٢

القرار- (تعال تعال أبرئ أراضينا
تعال لبيوتنا واغفر لينا ماضينا)٢

٢- (الله في وسطينا بمجد وسور من نار
رب الجنود معانا
ملجأ وقوة وجبار)٢

٣- (إلهنا عظيم مهوب وقدير
نرفع ليه قلوبنا
رجانا فيه كبير)٢

١- ربي ليك باغني وأرفع كل حمدي
ليك يليق تسبيحي وصوتي وغنوتي
في خوفي وقت ضعفي في حيرتي وسط ضيقي
كنت أنت معيني وترسي ومنقذي

القرار- بنباركك يا كريم نهديلك كل التعظيم
وحدك صالح وأمين للمنتهى
نرفعلك الترنيم نشكرك يا رحيم
وحدك صالح وأمين للمنتهى

٢- عمرك ما نسيت وعودك مالي حياتي بجودك
أفكارك ليّ خير ورحمة طول رحلتي
راعيّ وحبيبي فاديّ وصديقي
معايا طول الرحلة وماسك ايدي في سكتي

١- لما تكون تعبان أو عيان لما تكون حيران أو قلقان
ارفع عينك فوق في لحظة وصلي
لما تكون سعيد أو فرحان لما تكون حزين أو غضبان
في أي وقت وأي يوم صلي

القرار- لأنه قريب وسامع كل صارخ ليه
وحاسس باللي بتمر بيه تقدر تناديه
ولأنه فارق معاه حياتك وظروفك
مشاعرك وكل خوفك ارفع صوتك ليه

لو لوحدك أو في زحمة لو براحتك أو في لخمة
سكّن قلبك واهدى ثانية وصلي
حتى لو بعيد عنه سنين حتى لو نسيت تبدأ منين
بدم يسوع اتقدم ليه وصلي

لأنه قدير وضابط كل صنع ايديه
مفيش صعب عليه
ولأنه رحيم وصالح وحكيم اتكل عليه

القرار- على كل اللي فات من عمري يا ربي
شكر وتسبيح ماليين قلبي
لمسة إيديك وصوتك
هما رفيقي وسندتي
إنتَ اللي بيه باتحرك وباعيش
خير ومراحم ماتنتهيش
صديقي وسر وجودي

١- ولما أحاول أبص ورايا
وأرجع أشوف أول الحكاية
إزاي مشيت معايا في مشواري
وإزاي معاك تتبدل أحوالي
أول نجدة وآخر واحد ييأس من حالي
وبيملا حياتي بأغاني وسط الليالي

٢- معاك اتغَير هدف وجودي
معاك انفكت أصعب قيودي
وصار سلامي مفصول عن ظروفي
وفي حضنك باتحرر من قلقي وخوفي
فيضان أبوَّة ونعمة وإيده محاوطاني
وقلبي مديون ولاسمه هارنم من تاني

‎١- عندك بارمي كل همومي
عندك بارمي كل الأحمال
جايلك يا ربي بكل خوفي
عيني عليك وعندي إيمان

القرار- (في حضورك)٢
بتختفي الأحزان
(في حضورك)٢
كل تنهد بيهرب وبيبعد
وبيملاني سلام

٢- اسمك كافي إنه يشفي
اسمك كافي يطيب جروح
كلمة منك بتهدّي عواصف
وبلمسة واحدة بيهرب النوح

١- عارف اسم النجوم
قايس عرض السما
كفك وازن بحور
ده مافيش زيك إله
وإزاي ممكن أقول
إنك في يوم نسيتني
يا فاحص القلوب
جابلني وخالقني

القرار- (هاستنى ربي الإله
هاستنى وعيني شايفاه)٢

٢- فاهم صمت المجروح
مختبر الأحزان
يشفي ويرُد الروح
ويغير الأزمان
وإزاي ممكن في يوم
أشك في حبه ليَّ؟
أنسى خيره وألوم
حبيبي وفاديَّ

(زي النسور هاجدد قوة
تديني نور وفرح ونصرة)٢

١- (واحدةً سألتُ منك أن أسكن في بيت قدسك)٢
وأتفرس في هيكلك وأسجد طول الحياة

القرار- لك ينبغي التسبيح لك ينبغي التهليل
لك نرفع أيادي طاهرة
قد ذُبحت يا حبيب بدمك على الصليب
فديتنا واشتريتنا

٢- (عطشت نفسي إليك يا ربي كالأيل أطوق للمياه)٢
من لي سواك أبغي في الأرض ومعك لا شيء أريد