سهم فى الجون (14 ترنيمة )

١- عيني تفتَّح كل يوم لما باصحي وقبل النوم
تعتني بيَّ كل يوم ده انت ياربي خالق الكون

القرار - معاك أنا بامشي في كل لحظة.. بيك أنا بافرح كل ثانية
باسبح ليك.. عشان انت.. إلهي اللي فديتني

٢- ليك يارب باقدم قلبي وأفكاري وكل حياتي
بارفع إيدي أسبح اسمك أسجد ليك وأهديلك ذاتي

٣- ليك سلطان على كل حياتي وفي إيدك كل أوقاتي
ماشي وراك وأنا واثق انك ترعاني في كل خطواتي

١- ربي قائد حياتي في إيديه كل أوقاتي
يقودني في نصرة على الشيطان ويشبع احتياجاتي

القرار - أنا هافضل فرحان الشيطان مش راح يغلبني
مهما أكون تعبان ألاقي حبيبي يسوع يسندني
(أنا هافضل فرحان)٤

٢- وفي حروب إبليس عليَّ أنا هاسمع كلام فاديَّ
يسوع على طول جوة في قلبي وابليس تحت رجليَّ

١- انت المثال ليَّ مش هاخد حد تاني
غيرك ده انت فاديَّ اللي جيت علشاني

القرار - ربي انت النور اللي بيهدي خطواتي
وكل لحظة معاك بتنوَّر فيها حياتي

٢- يا يسوع قلبي بيحبك وكل حياتي تخضع لك
بوداعة أنفذ أمرك وسلوكي كمان يشهدلك

٣- بصلاتي ليَّ نصرة إبليس مغلوب وبقوة
كلمتك دايماً حية موجودة في قلبي جوة

١- لما تكون زعلان حزين والناس حواليك مش شايفين
والدموع في عينيك باينين كل أصحابك مش سألين
بص على الله اللي فاكرك هو حاسس بيك وعارفك وعينيه دايماً عليك

القرار - ساعتها هاتشكر ربك على طول وتكون فرحان
ترفع صوتك وتغني وتنسى انك زعلان

٢- يمكن تغضب تتخانق أو زهقان مش طايق
مزاجك كده مش رايق تبدأ يومك متضايق
افتكر ده يسوع حبك هو قادر يمحي زعلك وهايمسح كل همك

١- في كل مرة إبليس يتحداني
عقلي فاكر دايماً في يسوع ثابت إيماني

القرار - أنا هاقبل التحدي مهما تكون المتاعب
حتى لو السكة طويلة واثق اني غالب

٢- القرار في قلبي هاتبع ربي للنهاية
حياتي هاتشهد عنه وأعلن انها البداية

٣- أنا هاعمل بكلامه وهانفذ وصاياه
بسلوكي وكلامي راح أمجِّد الله

في يوم جاه الرب ونادى على نوح زمان
قاله تعالى اسمع ركز وافتح الودان
أنا تعبت من البشر خطاياهم في كل مكان
أنا جاي أفنيهم ويكونوا نسيان
حتى الطيور والحيوان قررت أمحيهم كمان
بس إنت بار وقلبي عليك حنّان
ليك ابني فلك وتعيش فيه بأمان

و دخل نوح الفلك وربنا قفل الباب
مطرة بدأت تنزل والسما اتملت سحاب
مية غزيرة جداً والدنيا بقيت ضباب
ينابيع في الأرض انفجرت والأرض بقيت خراب
من فوق من تحت مية والناس تغرق في سراب
صوت الصراخ عالي لنوح افتح الباب
لكن فات الأوان و ماعدش في مكان

١- أخلق فيَّ حياة ياربي أعشهالك بإيمان
وتكون حياتي عبادة تشهد عن ابن الإنسان

القرار - لأنه بوجودك إنت تتغير أشكالنا بيك
وتكون إنت الأصل وإحنا كلنا صورة ليك
وتكون أوانينا مراية تعكس مجدك يا مليك

٢- علمني أكون تلميذ وأشوفك بوجه مكشوف
أتعلم منك أكتر ومجدك عيني تشوف

٣- من مجد لمجد تاخدني أفرح وأنا وياك
لأن معاك حرية عشان كده هاستناك

١- لساني ليك بيسبح ده أنت غالي عليَّ
شكر وحمد يقدِّم ليك يا يسوع فاديَّ

القرار - بكل كياني يا رب أنا ليك وتثبت عيني دايماً عليك
هايفضل قلبي ماسك فيك حتى في وقت الضيق

٢- وداني تسمع كلامك ودايماً تعمل بيه
وصاياك على طول قدامي وصوتك مستنيه

٣- عينيَّ تقرا في كتابك إنك شخص عظيم
وأتعلم من صفاتك رب محب رحيم

أنا مهما بعدت هافضل مكاني هنا
نزعل ونغضب وفي يوم نتصالح كلنا
تفضل محبة أساسها واحد حبنا
محبة تكفّي تملا قلوبنا كلنا
بكرة النهارده ويعدي يوم بعد يوم
قلوبنا واحدة وبينا حب يزيد ويدوم

١- يارب أنا فعلاً عايز أسيب كل خطايايا
أمشي وراك وكلامك لي سراج جوايا

القرار - ازرع فيَّ بذرة جديدة تعمل في حياتي تغيير
نوَّر جوه قلبي نور يمحي الضلمة أنا مش أسير

٢- هاعيش بإيمان وأنا واثق وعودك هي رجايا
هاطلب مجدك فيَّ ده إنت يارب كفاية

٣- وإن جه ابليس يحاول يسرق زرعة إيدك
هاصرخ ليك وانتظرك ده مين يحميني غيرك

١- إن قالوا سني صغيّر وطولي يا دوب شبرين
أنا هاشهد عنك ربي دلوقتي مش بعدين

القرار - مش راح أقول إني صغير وهابطل أكون جبان
والناس حواليَّ هاتتغير بالنعمة وبالإيمان

٢- هارفض أي كلام من الناس حتى إن قالوا مش نافع
هاتشجع وأنا مليان حماس وأكون لصوتك سامع

٣- هارجع لكتابك دايماً وسلاحي هو المكتوب
ده كلامك ليه سلطان بيغيَّر القلوب

١- وأنا في إيدين يسوع سهم مبري مرفوع
أجري وأطير قدام لهدفي من غير رجوع

القرار - لأني سهم في إيد جبار وإيماني شعلة من نار
وصلاتي تهدم أسوار ده إلهي إله انتصار

٢- أنا باشهد عن يسوع قدام كل الجموع
بره وجوه بيتي راح أقول هو الينبوع

٣- هاصلي تغير بلدي مصر وكل أرضي
تسجد وتركع ليك ده الوعد مبارك شعبي