مهما هانعمل أو هانقول .. إنت يا ربي راسم الخطة
واللوحة مرسومة وجاهزة .. بتوصلها نقطة بنقطة
وإن كان وسط اللوحة خطوط .. متعوجة وكمان شخابيط
ده إنت الفنان الأعظم .. مش هاتسيبها بدون تظبيط
لأنك عارف اللي بيحصل .. واللي هايحصل بكرة كمان
والأحداث دي آلة في يدك .. زي الريشة في إيد فنان
وأكيد اللوحة عشان تكمل .. يبقى فيها تفاوت ألوان
فيها المبهج ويا القاتم .. وفيها الفاتح والبهتان
وزييها ألوان ليالينا .. اللي بتحكي نوع الأيام
فيها ليالي كساها سواد .. وليالي فيها ما بننام
وكل ده لكمالة الخطة .. المرسومة بأفضل إتقان
ولما تكمل بكرة الصورة .. تذمرنا ما يكون له مكان
