عطشان وقلبي ليه سنين عطشان
والشمس قاسية والحرارة لهيب
والأرض متشققة من كتر ما حميت
والشمس لا بترحم ولا بتغيب
يا شمس يا مولعة زي الحريق والنار
الخضرة يبست ومش باقي سوى الصبار
والأرض نشفت ونشفت مية الأنهار
فينك يا أيام الندى الخضرا
يا أم الحنان يا حلوة يا مطرة
فينك يا ضليلة فين إيدك تغطيني
وتميلي كفك وتسقيني
اطلع عليَّ يا سحاب يا أبيض
ابسط جناحك يا سحاب وافرد
وانطر عليَّ ميتك أنهار
تبل ريق العيدان المصلوبين في النار
افرد جناحك يا سحاب بالضل
وغطي وش العيال المطروحين في الظل
واجبر بخاطر الولاد العطشانين في الحر
اشتقنا ليك يا مطر اعطف علينا وطل
وآه يا قلبي يا حديد يا خشب يا صلب
يا شقفتين فخار ومتشكل في صورة قلب
عطشان ومحروم وصابر على الضنى والغلب
عايش سنينك بتحلم بالربيع والحب
(اطلع وشوف المطر يا قلبي يا عطشان
بانت بشاير الربيع فوق الغصون ألوان)٢
يا قلبي يا تايه ورا وهمك
ودع شقاك واقطع حبال همك
وارسم على صفحتك عصفور وورداية
وزع بشايرك على القلوب واملاها من فرحك
ده الشر يكوي القلوب وبناره يحرقها
والرب يرعى الشعوب وبخيره يرزقها
ولا حد يروي النفوس غير اللي خالقها
وهو يشبع كل أشواقها
(يفرد جناحه الكبير ضليلة من فوقها)٤
