لكن سمحت إرادتك يتولد في مكان حقير
ويعيش حياته في وسطنا محتاج فقير
ملك ولكن عرشه مفروش بالألم لأن ملكه مالوش نظير
يعرف معاني الاحتياج ويحس إحساس الفقير
عاش المسيح وسط البشر بين الأمم
وداق عذاب الناس وشاف ألم الفقير اللي اتحرم
وعرف مرارة اللي اتحبس و اللي اتظلم
و اللي اتضرب واللي أتشتم واللي اتقتل واللي اتجرح واللي اترجم
شاف واختبر وعرف تفاصيل الألم
سكن المسيح وسط الغلابة التعبانين وشاف دموع المقهورين
و سمع أنين المظلومين لمس وشاف اللهفة في عيون الجياع المحرومين
لمس وشاف الذل في عيون العيال الغلبانين
لمس وشاف الضعف ساكن جوه جسم العيانين
شاف العبيد شاف الخدم شاف الفراغ شاف العدم
شاف واختبر وعرف تفاصيل الألم
