أول كلام المسيح كان للبشر بركات
أول كلام للمسيح كان للبشر بركات
طيب خواطرهم وريح ضمايرهم
قال المسيح يا سعادة المساكين
يا بخت كل حزين يا بخت كل رحيم
يا بخت كل أمين خاضع لروح الرب
قال المسيح يا بخت من يحفظ طهارة القلب
يا بخت من يسمع كلام الرب
ويعيش حياته بالوفاق والحب
قال المسيح يا بخت من أخلص لإيمانه وشاف الصعب
واللي أنطرح واللي انضرب واللي أتشتم وأتسب
هايلاقي أجره كبير أكبر كتير من العذاب والضرب
قال المسيح الذنب مش بس ارتكاب الشر
ده كفاية بس إنك تفكر فيه أو جوة قلبك تبتديه
تبقى ارتكبت الشر في قلبك
حتى إن قدرت عن العيون تخفيه
ده الرب عارف وشايف كل اللي بتداريه وبتخبيه
السرقة بس مش تاخد حاجة من بيت جارك
أو تغتصب أي شيء ما يكونش من مالك
لكن كفاية إنك تفكر فيه أو جوة قلبك تشتهيه
تبقى ارتكبت الشرفي قلبك
والرب عارف كل ما تخفيه
قال المسيح الحب أكبر كتير من كل شيء فاني
الحب هو الله الحب رباني
الحب أكبر بالمظاهر والكلام
الحب أكبر من العداوة ومن الخصام
والعين بالعين والسنه بالسنه
مش هو ده الحل الصحيح
مش هي دي روح المسيح
الحل مش في الانتقام الحل في حب المسيح
تبني جسور الحب وتعلّي السلام
قال المسيح حب القريب حب الغريب حب اللي بيفيدك
حب القريب حب الغريب حب اللي بيضرك
سامح وسلم للإله أمرك وافتح مكان للحب في قلبك
قال المسيح بالحب ربك شوف شوف المثل وأتعلم
أرفع عينيك وشوف تلقى السما بتتكلم
الرب أدى الشمس والأقمار الرب أدى الميه والأمطار
مش بس للصالح بيدي الخيرعطاياه لكل البشر مش بس للأبرار
يفيض بخيره كمان حتى ع الأشرار
إذا كنت عايز تكون أبن السما أتعلم
شوف المسيح المثل والقدوة وأتعلم
كان المسيح السلام والحب والبسمة
كان المسيح السماح والحب والرحمة
كان المسيح الرضا والحب والنعمة
كان المسيح ترنيمه شفافة وفي المسيح الحب يتكلم
قال المسيح في ناس بتصوم علشان تبان علشان تبان
وتصلي في الشارع وتصلي في الميدان
في الزحمة بس بيقدموا الإحسان
وكل ده مش عباده دي منظره وإعلان
ليه يا شيوخ اليهود تتمشوا في الأركان
وتصلوا في الشارع وتصلوا في الميدان
وإن صومتوا يوم تعملوا قبل الصيام إعلان
وحتى فعل الخير والرحمة والإحسان
بتعملوا في العلن والأصل فيه إدمان
قال المسيح إن صمت يوم خلي صيامك في سرك
خلي الصيام والصلاة بينك وبين ربك
وأدي الفقير وأحسن إليه في سرك
وأنكر جميلك وخيرك حتى عن نفسك
قال المسيح أرفع عينيك للسما وأطلب ما تحتاجه
وكل من يسأل سؤال أديه ما يحتاجه
وكل من يطلب طلب يلقى ما يحتاجه
وكل من يلجأ لذاتي وينتظر
افتح مخازن نعمتي ياخد ما يحتاجه
