ترانيم عربية

1- أنا واحد على قدي ولا باخد ولا أدي
إيدي دايما على خدي واللي في بكره أنا ماعرفوش
وقتي الصعب مابيعدي مش بمزاجي ولا بيدي
وليه الفرح مش عندي وإيه في إيديَّ وماعملتوش
(لكن هو جالي وقالي أقوم من مكاني
رفعني هو وعلاني وماسبنيش
غير فكري وزماني خلاني واحد تاني
أداني حلم وأماني خلاني أعيش)2
2- كنت أعمى مش شايف من كل حاجة خايف
شكل الفرحة مش عارف وأصحابي هما الدموع
خلاص مابقتش مستحمل ومش عارف أنا إيه أعمل
وإزاي بالشكل ده هاكمل ومين يحس إن أنا موجوع
(لكن هو شافني وبإيديه لمسني
ومن الضلمة جابني خلاني أشوف
حس بيَّ وشافني مبقاش الحزن عنواني
خلاني أقوى من تاني على الظروف)2
3- كنت ضعيفة محنيَّ والدنيا قاسية عليَّ
من كل الناس منسية وعلى الحال ده بقالي سنين
لا حد داري بإحساسي نفسي في يوم أرفع راسي
لحد امتى هقاسي وأعيش عمري في آلام وأنين
(لكن هو ندهني لكلامه الحلو كلمني
وبإيديه لمسني لفوق بصيت
من قيودي حررني قدام الكل بررني
وفي يوم الرب رحمني فحضنه أترميت)2
4- كنا في وسط الميه والريح صعبة و قوية
والأمواج كانت عالية وقلنا خلاص ده أكيد بنموت
ما هو سايبنا لوحدينا ولا حتى داري بينا
وبنصرخله ينجينا وهو ليه مش سامع الصوت
)في الهزيع الرابع كان لصراخي سامع
دور على قلبي الضايع وناده عليه
رَحم ضعف إيماني وعلى الميه مشاني
قالي متشكش تاني فمسكت إيديه)2