1- مابتِنساش وعودَك أبَدًا .. مَهما طال عَليها الزَّمَن
مابتِنساش وعودَك مَهما .. غَطِّتنا أزَمات ومِحَن
مابتِنساش وعودَك مَهما .. مَرّ عَليها أيَّام وسنين
مِتشالَة لِوَقت ومِتصانَة .. مَعروف ليها إمتى وفين
يمكِن أشُكّ ويمكِن أتوه .. وعينيَّ مِش شايفَة السِّكَّة
يمكِن أقول أنا ضِعت خَلاص .. أتاريها دي بداية البَرَكَة
(مابتِنساش وعودَك أبَدًا .. مَهما طال عَليها الزَّمَن)2
2- مابتِنساش وعودَك أبَدًا .. مَهما أكَل الجَراد سِنين
مابتِنساش قادِر تِعَوَّض .. وترُدّ المَسلوب ضِعفين
دَه مافيش في قاموسَك يا قَدير .. كِلمَة اسمَها مُستَحيل
في الصِّعاب تِفتَح أبواب .. تِدِّي ثَمَر وافِر وغَزير
ما بتِتفاجِئ بِالأحداث .. ولا تِضطَّر لِلتَّغيير
كُلُّه مَعاك مَعمول لُه حِساب .. وبسُلطان تِعمِل لِلخير
(مابتِنساش وعودَك أبَدًا .. مَهما أكَل الجَراد سِنين)2
3- مابتِسقَطش وعودَك أبَدًا .. مَهما كِترِت الصُّعوبات
مَهما رَفَع العَيان في صوتُه .. وخوفنا زاد في التَّحَدِّيات
كُلُّه لازِم يصير ويحصَل .. ويتِمّ في وَقتَك مَظبوط
السَّما والأرض تِزول .. بَس كَلامَك مِش هايموت
نُملُك ما لينا نحُطّ أيدينا .. لا أسوار تُقَف وسُدود
يعلا هُتافنا وانتِصارنا .. مَعاك فَرَحنا ما لُه حُدود
(مابتِسقَطش وعودَك أبَدًا .. مَهما كِترِت الصُّعوبات)2
مابتِنساش وعودَك أبَدًا .. مَهما أكَل الجَراد سِنين
مابتِنساش وعودَك أبَدًا .. مَهما طال عَليها الزَّمَن
