كلمتك

1-قول لي شكوتك أصل الكلام
لو تشكيه يطفي نار تقيد
علّي صلوتك لو في الكلام
دعوة سلام اصرخ وعيد

2-كلمتك ممكن تكون نقطة ندى
تنزل على قلبي اللي عطشان يرتوي
وكتير أوي الكلمة تسيب جمرة لهيب
تنزل على قلبي الرقيق يتكوي

3-دوّر يا صاحبي في قلبك الصامت سنين
على كلمة حلوة تصحي فيه نبض الأنين
دوّر ونادي في عتمة الليل على البريء
كسّر وزيل قلب الحجر تلقاه رقيق
حفّر ينابيعك وفجّر الإحساس
وشق صخر القسوة للأشواق طريق

4- نفسي نتحاور ونتكلم بود
لما أسأل ألقى عندك أحلى رد
لما تطلب قلبي مش ممكن يصد
لو نخاف على بعضنا قلبي أرتاح بجد
يلا نسبق عمرنا لو ننسى لحظة نفسنا
نشعر أنين الآخرين ما نقولش في الأول أنا
يحلى الزمان من حولنا
نلقى الحياة فردوس هنا
لو نزرع الكلمة محبة وحبة حبة
يطرح سلام نجنيه فرحنا