عندي حكاية أقولها للأولاد أولاد أصحابي
من كل البلاد
حكاية عني وعن يسوع حبيبي
ونصرتنا الأكيدة على مكر الشيطان
فتحوا ودانكم وانتبهولي كويس
عشان تنتصروا دايمًا وتبقوا في أمان
في الضلمة ماشي في مرة من المرات
جالي يتسحب كمكر الحيات
حاول يقول لي ده أنت ماشي لوحدك
وفي الضلمة إنت خايف قوام هات إيدك هات
قلت له امشي لأني مش لوحدي يسوع ماسك بإيدي
وهو عشاني مات
وفي مرة بالعب مع ابن الجيران جه قالي
اكدب عشان تبقى الكسبان
قلت له لأ يسوع راح يزعل مني
وأنا قلبي مش هايفرح ما دام هو زعلان
قام فر مني وجه جنبي يسوعي
وفي لحظة لقيته جنبي وحسيت بالأمان
خدها نصيحة على مر الأيام إبليس
لو جالك ما تسمعلوش كلام
قول له يا شاطر ما تتشاطرش عليَّ عشان أنا مش قدك
وملكش معايا كلام
إن كنت شاطر تروح تتحدى ربي
وهو هايوريلك ويغلبك تمام
