- أنا نزيل هنا ع الأرض
مش مستني سعادة وورد
مش مستني العيشة الرغدة
أو باملك في العالم رغبة
مش مستني مديح أو وِد
- مش مستني ليالي ملاح
أو مستني أشوف أفراح
أو عشمان في الدنيا جمال
أو متساق ورا أي آمال
أما ألقاها البال يرتاح
- عارفين ليه؟ أقول لكم ليه
مش إكمن عشان أنا فقري
أو باحسبها بمالي وفقري
أو محتاج يادوب قرشين
يجيبوا الشقة ودبلتين
أو أحلام ووراها أنا باجري
- مش إكمن عشان أنا يائس
أو غرقان في طموحي وحاسس
إن آمالي سراب في سراب
والحاضر والجاي عذاب
أو مكبوت في آلامي وبائس
- مش متوقع مش مستني
أصل إلهي حبيبي وعدني
وقال الضيق ده ف كل طريق
لكني صديقك مهما تِضِيق
مش مستني لكن متهني
- عارفين ليه؟ أقول لكم ليه
ده مافيش عبد أعظم من سيده
أو مولى ومرتاحة عبيده
جه وأتصلب ياللعجب
هو ضحية وأنا السبب
جه يحط أيدي في أيده
- على دربه باسير الخُطى
وآلامي مش رايحة سُدى
ده قلبه لقلبي محتضن
وأنا متغرب ليَّ وطن
أه متجرب وهادوس العدى
- وبعد الليه ومن غير ليه
أنا جاي
بدون أقنعة روحانية
أصل أنا عارف إنك حي
وكاشف قلبي والنية
- إنشئ من تجربتي صبر
ده الصبر تزكية
ولحد ما ييجي يوم القبر
خليني مشغول بقضايا روحية
