أمير جرجس (2 ترنيمة )

1-(أنا مستنيك مهما تطوِّل
عيني عليك مش راح تتحول
وأنا في أمان علشان م الأول
سايب في إيديك كل حياتي)2
(تيجي الضيقة أنا مستنيها
اختبارات لازم أعديها
راح أقرب وأوصل لك بيها
بيك انت هاعيشْ انتصاراتي)2

القرار- فوق ضيقتي هاقف وهاكوُن أعلى
كل الصعوبات وياك سهلة
والمُر أكيد هايكونْ أحلى
علشان نعمك بتعزيني
شايف أفراح وسط تجارب
شايف أجناد عني تحارب
وأنا كده أو كده دايماً غالب
طول ما انت معايا بتحميني

2- (مش خايف مهما هايحصَل لي
مهما حصل لي أنا برضو هاصلّي
والخوف أبداً ما هايوُصل لي
إزاي أخاف وانت بتسمع لي!)2
(حاسس بسلام وأنا بانده لك
وأنا عارف أبداً ما استاهلك
ده أنا أشوف أحزان ولا أتجاهلك
أحزاني تزيد طب إيه يعني!)2

1-(صلاتي ليك أنين قلبي
حنين العمر للمعنى
ومهما تتوه خطاوينا
تعود من تاني تجمعنا)2
(صلاتي ليك بتغسلني
بتغزل روحي توب فرحة
بتاخد قلبي من إيده
وترسم له طريق بكره)2

2- (صلاتي دمعة على بابك
وشوق الروح لأعتابك
وأنت الأهل والصُحبة
حياتي تموت في غيابك)2
(صلاتي ليك بتشفيني
تحررني وتسبيني
ويملا قلبي نور حبك
يا مالك عمري وسنيني)2

3- (صلاتي ليك دوا جروحي
شبع قلبي في زمان الجوع
ولما تفيض بيَّ آلامي
إيدك تشفي وجع روحي)2
(ندى الفجرية دي صلاتي
يصحي الروح جوايا
نغم يسري في وجداني
يسود حبك على حياتي)2