مايكل إسحاق (36 ترنيمة )

القرار- (افتح قلبي القاسي واملك فيه يا يسوع
كنت باعيش وأنا ناسي من غير أي رجوع)2

1- (كنت في جهلي عنيد رافض صوتك ليَّ
وأنت مادد لي الإيد بمراحم سماوية)2
2-(ياما سمعت كتير وفضلت في خطايايَ
ورفضت التغيير وعشت لدنيايَ)2
3-(إبليس رابط إيدي بسلاسل وقيود
نفسه يفضل سيدي مش عايزني أعود)2
4-(وآدي دموع التوبة من إنسان محتاج
إنك تيجي وتشفي وتبقى لنفسي علاج)2

1-(يا ربي أنت عارف إني محتاج إليك
وقلبي أنت كاشف كله قدام عينيك)2
(تقدر ترثي لضعفي تقدر تمحي الذنوب
ولجرح قلبي تشفي وأنا تايه في الدروب)2

القرار- (أحضانك تنتظرني قلبك مليان حنان
وإيديك بتنتشلني م الضعف وم الهوان)2

2- (يا ربي أنت عارف إني وحدي ضعيف
وعجزي إنت شايف وحملي مش خفيف)2
(وبحُبك بتحاصرني مهما حاولت الهروب
شخصك دايمًا فاكرني مستني أرجع وأتوب)2

1-(ياللي معاك الرحلة بتحلى رغم تعبها وكل ما فيها
ياللي أمانتك بتشجعني إني أسلِّم وأنا بامشيها)2

القرار- (كل نجاحي بيرجع ليك ياللي النفس ارتبطت بيك
عرفت نفسي الخير وياك ولقيت كل آمالي فيك)2

2- (لما بصِغر النفس باجي لك تفتح عيني على أمجادك
حامل كل الكون ده في إيدك أبداً مش راح تنسى ولادك)2
3- (تِجبِر كسر النفس تعوَّض أي خسارة في البرية
ليك في الموت يا إلهي مخارج ليَّ في شخصك نعمة غنية)2

1- (ياللي مليت حياتي أفراح بعد ما كنت بعيد
خليت حُزني ماضي وراح وابتدت الأناشيد)2

القرار- (فرحك جوه القلب يا سيدي
هو سروري ومصدر عيدي)2
(ولا يتأثر باللي بيحصل أو إيه مهما إن كان)2

2- (وارتوى قلبي بغمر كلامك اللي يرد الروح
كلمة تداوي وكلمة تعزّي وكلمة تشيل النوح)2
3- (املأ حياتي بثمر الخدمة ناس تتعرَّف بيك
فأشارِك السما أفراحها بخاطي بيرجع ليك)2
4- (مستنيك يوم لما تجيني تكتمل الأفراح
يوم عُرس الخروف نتهلل ونشوف الجراح)2

1- ارفع قلبك للحنان ثق في إلهك هو يصون
ثبت عينك بالإيمان أصل إلهك هو حنون
القرار- دا يسوع يملا القلب بفرحة إيده تداوي هموني الجارحة
وعده إنه لي معين هو إله صادق وأمين
2- يقدر يمسك إيدك تاني ويعديك فوق كل حصون
يبهج قلبك مهما إن كان فيه آلامات وحروب وشجون
3- حتى إن كان إبليس بيهيج أو إن كان فيه سيوف وسجون
لما تعيش في حياتك بيه كل الغربة معاه هتهون
4- خلي حياتك تشهد ليه وسط العالم مهما يكون
عيش لإلهك واثبت فيه تقدر تهزك كل ظنون

1-هنسيب الدنيا وما فيها نظرتنا هناك ع الأبدية
عايشين علشان نكرم شخصك وحياتنا نقدمها هدية
مش راح نتأثر أو نمشي ويا الأفكار البشرية
لكن ورا صوتك وإرادتك (هنعيش إن كان لينا بقية)2

القرار- (جهزنا علشان تستخدمنا)2
خلينا نعيش بالمواعيد وإيماننا يكبر ويزيد
ارسلنا لكرمك خلينا نرجع بثمارك يا مجيد

2-عايزين روحك يعمل فينا نبقى ينابيع للعطشان
توصل كلماتك يا فادينا بغِنى النعمة في كل مكان
إدينا قوة بسلطانك خلينا نعيش لك بالإيمان
وإيماننا يكون فوق المنظور (نتحدى بيه كل عيان)2
3-مهما إن كان في طريقنا صعوبات كانت وآلام
هنكمل طول ما أنت معانا نفضل في طريقنا لقدام
يمكن نتألم أو نتعب أو حتى نعدي في ألغام
تمسك بإيدينا وتدينا (نمشي فوقها بالأقدام)2

القرار- مستني مجيئك وعايش غريب
بشوق لرجوعك يا أغلى حبيب
(سهران في اِنتظارك وباحمل ثِمارك
وباشهد لحُبك وشايل الصليب)2

1-(مهما الغربة طالت وأشواكها زادت
يقيني في وعدك بإنك قريب
ولو الأماني في الدنيا دي خابت
هتفضل في قلبي الرجاء والنصيب)2
2-(حياتي غانيها بحبك راويها
ولا شيء ياخدني عن حضنك بعيد
دي الدنيا وما فيها لا يوم هتساويها
نظرة لشخصك يا نوري الوحيد)2
3-(رفعت عينيَّ إليك يا فاديَّ
عن كل مباهج قدمها الزمان
ده قلبي وحياتي وكل ما ليَّ
عطية يصونها في قلبي الإيمان)2

القرار- بغلاوة نفسي على قلبك وكرامة نفسي في عينيك
أنا عايش دايماً متطمِّن مضمونة حياتي في إيديك

1- (أنا فيك وفي فكرك م الأول من قبل العالم ما يكون
يا ضامنّي بالحب الأبدي وثباتي بشخصك مضمون)2
2- (ده وجودي انت اللي راعيه وهمومي دايماً شاغلاك
والخير من شخصك بالاقيه لحد ما هاوصَل لسَماك)2
3- (بمحبة قلبك بتعوَّض دي سنين إن ضاعت بجراد
هترجَّع تاني الأمجاد وتفيض على نفسي بحصاد)2

1-ياللي ليك كل السلطان
في الأرض وفي البحر كمان
جايين لك بخشوع ساجدين
بمحبة وشكر وعرفان
بنقدم كلمات الحب
مش بشفاهنا لكن بالقلب
لو نقدر العمر بطوله
نهتف لاسمك أنت يا رب

القرار- (ده مافيش حد في حبك أبدًا
وأمانتك وصلاحك لينا
نعمة تكفي تقودنا دايمًا
مين زيك أنت يا فادينا)2

2-مين غيرك جانا وأنقذنا
من سلطان وقيود الشر
لما بذنوبنا أتقيدنا
أتعذبنا ودُقنا المُرّ
جيت أنت اتقيدت بدالنا
وأخدت مكان الأشرار
وقبلت إنك تاخد عارنا
علشان تطلقنا أحرار
3-مين غيرك قائد رحلتنا
ماشي معانا في كل مكان
بمسيرك نتميز احنا
ده معانا رب الأكوان
الناس بتئن وتتحيَّر
لكن احنا معاك مش خايفين
تفضل أمين مهما بنتغيَّر
أصلك أنت يا رب معين

1-جهز ربي نفوسنا تكون دايمًا صالحة لخدمة شخصك
واجعل فينا شهادة نقولها عن إحسانك ربي وحبك
زيد خلوتنا ويا جلالك خلينا نقعد ننسى أوقاتنا
نشبع بيك نتملي من حقك وتفيض فينا لكل إخواتنا

القرار- (كرِّس فينا حياتنا لشخصك ونكون ربي ليك أمناء
تصبح أنت هدفنا الأول نسعى نكون عنك سفراء)2

2-ألمع فينا جوه قلوبنا خلينا ربي نحبك أكتر
قودنا بروحك واستخدمنا وسط تعبنا قلبنا يشكر
في الخفا دربنا وأيّدنا نقبل شرف الخدمة معاك
جوع أو عري أو حتى إهانة نتحمل واحنا وياك
3-ياللي جميلك غطى نفوسنا وشرف لينا تستخدمنا
خلّينا ربي نقدر عملك ونقدم لك كل حياتنا
تحت إيديك خلّينا نتواضع شكِّل فينا أحلى إناء
ويكون نافع يرضي السيد نسعى ونتعب ليك بسخاء