١- علشان الناس حواليك يرضوا وتلاقي قبول
لازم حتماً تمشي وراهم في طريق مقبول
لو مرة تخالف وتفكَّر تبقى المسؤول
وتلاقي الناس يبعدوا عنك وتعيش معزول
وأنا عايش أي كلام وخلاص
وبامثِّل على نفسي وع الناس
وما دام دي السكة المطلوبة
هامشيها كده من غير إحساس
٢- علشان الناس حواليك يرضوا وتلاقي قبول
لازم حتماً تنسى إرادتك وتعيش على طول
في طريق معلوم بحدود مرسوم وضمير مشلول
وتعيش في السر حياة تانية من غير ما تقول
وأنا عايش ضد ضميري كمان مش حاسس إني بقيت إنسان
وباعيش في الفورمة المطلوبة مبسوط ما يهمش لو زعلان
٣- يارب أنا عايز أعيش واضح وإيماني أصيل
وأنت اللي تحدد لي طريقي وتكون لي دليل
والخطوة أخطيها بريئة من غير ما تميل
وأحقق ذاتي وكياني من غير تمثيل
مش عايز أمثل وأنادي أنا عايز أكون إنسان عادي
والأبيض فيّ يكون ظاهر والأسود ما يكونش رمادي
مش عايز أمثل وأنادي أنا عايز أكون إنسان عادي
مايهمش أرضي الناس لكن إنت اللي تكون وحدك راضي
