جون اسطفانوس (94 ترنيمة )

عمري كله عشت أضيع .. سنين حياتي من إيديا عشت في وحل الخطية .. والحياة عمت عينيا
الظروف حجة خيابتي .. في الشرور بانت حقيقتي كنت واهم نفسي فايق .. لكن غشاوتي ضيعتني
اتقفل باب الخطية .. لقيت إيديك بتحاوطني ومش عارف منك أهرب .. وأديني جيت ولاقيتني
لسة فاكر نفسي أقوى .. من حاجات توهتني والشيطان واقف وساكت .. كنت فاكره بيساعدني

القرار - ولسة يا ابني بتسأل إن كنت بحبك ولا
كل إللي عملته عشانك ولسة يا ابني بتسأل
1- إسأل آهة أنيني إسأل نظرة حنيني
إسأل طعنة جنبي ويا شوكة جبيني
إسأل مسمار في إيدي مغروس ينزف وريدي
إسأل صليب العار عطشان سقوني مرار
2- إسأل جلدة ضهري إسأل لطمة خدي
إسأل كان إيه ذنبي لما الجنود أهانوني
إسأل صلبي مكانك الموت دسته عشانك
اتحملت العذاب نزعوا عني الثياب
3- إسأل نفسك تجاوبك هتقولك إني جنبك
دا مجرد إنك عايش دا يأكد إني صنتك
جزاءك كان الموت حرمان من الملكوت
ومهانش عليَّ يا ابني وعشانك جيت أموت
4- صعبان عليَّ يا ابني بتضيع قدام عينيا
ومنين تجيب أعذار لتفوز بالأبدية
حررتك من العبودية واديتك البنوية
شلتك من وسط الشوك ضميتك للرعية
ولسة يا ابني بتسأل إن كنت بحبك ولا
أنا المفروض إللي أسال فاكرني يا ابني ولا

دي حكاية ن زمان عن قوة الإيمان
بصوم وصلاة ودموع نقل الجبل سمعان
إسكافي كان فقير إنسان بيحب الخير
علي كتفه شايل جرة بيخدم بيها الغير
وفي يوم في شغله كان شغال في هدوء وسلام
بص وشاف بعينيه منظر مكنش تمام
فضل يخلع عينيه بمخرازه بإيديه
نفذ بالحرف وصية وهانت عينه عليه
وفي مرة المعز قال وروني بالأعمال
مكتوب إن إيمانكم يقدر ينقل جبال
قام الأنبا إبرآم جمع الشعب قوام
وصلوا بقلب واحد وصاموا تلت أيام
ظهرت أم الحنان للأنبا إبرآم
وقالت له بين الجموع هتلاقي دباغ غلبان
قله الرب اختارك تنقل جبل الإيمان
ترفع والشعب معاك صلاتكم للديان
وبسرعة المؤمنون صرخوا كرياليصون
تزلزل كل الكون وتحرك السكون
قام الجبل قدامهم شافت الشمس عيونهم
جبل المقطم كان رمز لقوة إيمان

كنا زمان كنا وكان كنا نعيش كل الأمان
لما كان ملء الزمان عايش ما بيننا أعظم حنان
لكن زمانا زمن الجحود زمن مافيش مافيش الأمان
إلا مكان هو المكان فيه الحنان فيه الأمان
إللي اشتريته بسفك دمك علي الصليب حساب مدفوع
يا حضن دافي يا نبع صافي يا حب فايض من الينبوع
فيه الإيدين تلمس جروح تشفي تطيب كل الجروح
فيه العينين كاشفة الظلام كاشفة خبايا كل الظلام
صرنا عبيد .. صرنا إماء وللخطية لابسين تيجان
لكن صليبك فك القيود حطم حدود غلب الشيطان

القرار - يا طاهرة يا أمي يا رمز العطاء
حمامة وطايرة فوق في السماء
1- يا إناء عظيم مختار مملوء من الينبوع
غيرتِ لينا الدنيا بميلادك ليسوع
2- يا أمي معاكِ بننسى هموم الدنيا الفانية
لأن في حضنك فايض حنان يملا الدنيا
3- عطشان يا نبع صافي ارويني من الحنان
دا حنانك فاض وعدى كل حدود الزمان
4- أصرخ في كل الكون بعلو حسي وأقول
يا قبة موسى انتِ يا أم بتول

إحنا كورال ملاك الذبيحة ليل ونهار وبكلمة صريحة
جينا نرنم بقلوبنا الجريحة كلمات بسيطة لكن مريحة
ونقول لملاكنا يقول لفادينا يرحمنا ويقبل مننا الذبيحة
شفنا ملاكنا بسيف من نار حارس ذبيحة إله جبار
شايفينك ملاكنا بين الشموع بعيوننا الغريقة في بحر الدموع
شكراً شكراً يا ملاكنا وصل وصل رسالتنا

1- مش يهوذا بس إللي خانك مش هو بس إللي باعك
أنا كما شريك يا ربي شري سبب كل آلامك
القرار - خطيتي عرتني وذبيحتك سترتني
لولا حبك وعطفك ما كنت جيت وفديتني
2- بإيديا رسمت لك طريق وكان كله آلام وضيق
بإيديا ضفرت لك تاج بإيديا سمرت يداك
3- مش هما بس إللي طعنوك ولا الخل بس سقوك
بإيديا والسوط جلدتك بإيديا والمسمار صلبتك
4- دمك جري وسال أنهار ارتوى منه أبرار وأشرار
ولما قلت أنا عطشان بإيديا سقيتك كل مرار
5- مهما انفجرت أنهار ومهما اتبدلت أزمان
حبك يا رب ليَّ باقي علي طول الزمان

القرار - آه لو تعرف إيه إحساسي لما عشانك كنت بقاسي
علي الصليب المر سقوني كنت ولسة بسببك أقاسي
1- بص لتاج الشوك علي راسي شايف يا ابني إزاي كان قاسي
شوف بصعوبة إزاي أنفاسي من مسمار مغروس
2- حط صباعك جوه في جنبي تلقى الحربة جرحت قلبي
من الكرباج متقطع ضهري وعشانك يا ابني كان صلبي
3- كل دا يا إبني عليّ يهون خزي وعار ودمع عيون
إلا قساوتك والجحود أصعب من جنبي المطعون

راجع يا ربي وندمان راجع من بعد الشرود
جايلك ومحمل أحزان وخطايا من غير حدود
جايلك يا أبويا وعطشان طمعان في كل الوعود
أخطيت يا أبويا يا حنان آسف علي كل الجحود
يا نفسي كوني مستعدة كوني دايماً في انتظار
اسهري وصلي بدوع واوصلي الليل بالنهار
شهلي وهمي الرجوع ابكي دمع حرقة ومرار
سلمي قلبك ليسوع دوقي حياة الانتصار
إغسلني يا ربي بدموعي طهرني من الخطايا
إرحمني واقبل رجوعي شددني ثبت خطايا
أدبني يا أبويا برحمتك بسياط حب وحنين
مشيني معاك في سكتك وافضل جنبي معين

«عَرِّفْنِي يَا رَبُّ نِهَايَتِي وَمِقْدَارَ أَيَّامِي كَمْ هِيَ،
فَأَعْلَمَ كَيْفَ أَنَا زَائِلٌ.5 هُوَذَا جَعَلْتَ أَيَّامِي أَشْبَارًا،
وَعُمْرِي كَلاَ شَيْءَ قُدَّامَكَ.
إِنَّمَا نَفْخَةً كُلُّ إِنْسَانٍ قَدْ جُعِلَ.