صفوت ناجى (4 ترنيمة )

لما جروحك تبقى صليبك أشكر على كل عطاياه
إبليس همه انه يجيبك وينسِّيك حبك لله
نفسه يشوفك عبد ليه يأمر هوَ وأنت ليه
قول له لغاية هنا كفاية ليَّ سيد يترد عليه
ارفع قلبك للإله قوله أنا طالب حماية
طالبك أنت طوق نجاة نعمتك ليَّ كفاية
تسمع منه صوت حنون ده انت واحد من ولادي
انت ابني مهما يكون وإبليس مطرود من بلادي
إبليس لو جالك يجرب امسك في صليبك تلاقيه
يهرب مش ممكن يقرب أصله عارف ايه اللي فيه
ده إلهنا غلب وحرر نفوس كتير اتكلوا عليه
حرر أسرى ومسبيين وكل ضعيف يحتمي فيه
ارفع عينك للسما قوله يا ربي نفسي أشوفك
جاي تاني على السحاب ويا مجدك ويا خوفك
جاي تاني ... جاي تاني ... جاي تاني

وأنا بالعب كورة في بيتنا زي كل يوم
شوطت شوطة من بتاعة النجوم
الكورة وقعت الشماعة والهدوم
وجت في صورة فرح بابا وماما
يا ترى هاعمل إيه لما ماما هاتيجي
أقولها الحقيقة وزي ما تيجي تيجي
ولا أقولها إن القط بتاعنا اتجنن
وقلب الدنيا ووقع الصورة واتفنن
قول الحق حتى لو كنت هاتتعاقب
قول الحق حتى لو اتحرمت من حاجة حلوة
قول الحق عشان يسوع بيحب الحق
وكل كلامه كان دايماً حق
أعز صاحب عندي في المدرسة
قلي تعال نروح في حتة كويسة
ولو تأخرنا قلهم كان عندي درس
وهي كدبة بيضا وأكيد ما تتحسبش
يا ترى أروح معاه ولا أستأذن بابا
وأكدب الكدبة البيضا وأقول خلاص هاتعدي
ولو ما رضيش صاحبي هايزعل مني
وهايقعد فترة كبيرة أكيد مش هايكلمني
قول الحق حتى لو خسرت أعز صاحب
قول الحق الحق دايماً هايخليك مرتاح
قول الحق عشان الكدب ما فيهوش ألوان
قول الحق قول الحق

المنبه رن الصبح على ميعاد المدرسة
ودي تبقى حاجة أكيد مش كويسة
لكني افتكرت حاجة مهمة خالص
قبل ما أغسل وجهي هابتسم
صباح الخير يا بابا يا ماما
يا أحلى عيلة
صباح الخير يا مصر
يا بلادي الجميلة
الابتسامة خلت يومي أحلى
علشان كدة هافضل ابتسم
الابتسامة أجمل علامة
تترسم على وشي طول اليوم
هدية من ربي لما أدانا
سلام في قلوبنا على طول يدوم
لحارس عمارتنا الأمين أنا هابتسم
ولما أقابل واحد مسكين أنا هابتسم
لأصحابي وللمدرسين أنا هابتسم
علشان الابتسامة خلت يومي أحلى
شكراً ليك يارب على اليوم الجميل
شكراً على كل عطاياك قليل أو كتير
شكراً على الصليب وعلى حبك
علشان كدة هافضل ابتسم
الابتسامة أجمل علامة
تترسم على وجهي طول اليوم
هدية من ربي لما أدانا
سلام في قلوبنا على طول يدوم