توبنى (10 ترنيمة )

1- كان ليَّ ناس من قلبي كانوا قريبين على راحتي وياهم اوي وحنينين
كنا بنوحش بعض مش لو فات يومين لو فات على بعادنا يا دوب حبة ساعات


القرار - أيام جميلة .. خدوها وياهم وراحوا أيام طويلة .. وقلبي مستحمل جراحه
لكن يا قلبي لو صحيح مش موجودين ربنا موجود وعنده تعزيات


2- بيمد ايده يشيل دموع المجروحين ويمد جسر الفرح للقلب الحزين
بيه هاكتفي ده حبيب وفي وصديق أمين وهو هايعوضني عن كل اللي فات
3- و انت ماسكني يا ربي من إيدي اليمين يا ربي وانت معايا أنا هاحتاج لمين
تهرب هموم قلبي وأتعاب السنين أول ما باجي جوه لسترك وأبات

1- اللي بيقدر يغفر هو .. اللي بيشفي من جراحاتي
ويكللني برحمة ورأفة .. وبيفدي من الحفرة حياتي
زي يوحنا باحب أميّل .. على صدر يسوع اللي فداني
هو طويل الروح وحنيّن .. و بيشبع بالخير أيامي
القرار - كل ما فيَّ يبارك اسمه الرب اللي مفيش في صفاته
أنا بارفع إسمه و باسجد له أنا مانساش أبداً حسناته
2- مجري العدل وهو النصرة .. لما باكون مظلوم وباعاني
بيشيل همي ويبعت فرحة .. تسكن قلبي مكان أحزاني
و كبعد المشرق من المغرب .. أبعد عني جميع معاصي
من رحمته قلبي بيتعجب .. ده وعدني بحياة أبدية
3- على خائفيه دايماً يترأف .. ومخافته تبدد لي مخاوفي
من السموات بيبص وشايف .. احتياجاتي وداري بضعفي
عارف إني تراب وبيرسل .. إيده القادرة تشيل ضعفاتي
هو بدمه الطاهر يغسل .. كل شرور عمري وشهواتي

1- ياللي فاكرني وأنا ليك ناسي يا يسوع حنّن قلبي القاسي
نادي عليَّ يارب وجيبني .. توبني
ياللي معاك بتخف آلامي عايز أعيشلك طول أيامي
من قلبك يا يسوع قربني .. توبني

القرار - قلبي بيصرخلك يا معيني ريحني ده الشر تاعبني
باترجاك يا يسوع علّيني فوق شهواتي اللي بتغلبني

2- أنا شايلك في القلب وجايلك عارف أفضالك وجمايلك
ياللي أنا سيبتك ولا بتسيبني .. توبني
اغفر واستر كل عيوبي كرهني في شري وذنوبي
وفي وصاياك يا يسوع حببني .. توبني

1- أبويا سبت حضنه و أخذت نصيبي منه
وسافرت بلاد بعيدة ونسيته . بعدت عنه
الناس لما شافوني على طول طمعت في خيري
وبدأت أحتاج سابوني راحوا شافوا حد غيري


القرار - أنا كنت في بيت أبويا غني . عندي حاجات كتير
وبقيت مش لاقي آكل حتى طعام الخنازير


2- فكرت أرجع لأبويا لو حتى أخدم هناك
وهأقول غلطان سامحني و اسمحلي أعيش معاك
أول ما بدأت أرجع شفت أبويا موجود
كان كل صبح يطلع يستناني أعود
3- اداني هدوم جديدة لبسني أحلى توب
ولاقيت نفسي سعيدة لما ابتديت أتوب
قومني كنت راكع خدني في حضنه ودمع
فبكيت وقلت: راجع حبك خلاني أرجع
ورجعت لبيت أبويا من بعد غياب كتير
ده ملك ولأني ابنه خلاني بقيت أمير

1- بتجرح وتعصب .. وتضرب وتشفي
لو اليأس يغلب .. بتبعت أمل
وتسمح بضيقة .. لكنك في صفي
بتوجد طريقة .. لكنك في صفي
بتوجد طريقة .. ومخرج وحل


القرار - بتيجي في ميعادك وتنقذ ولادك وإبليس قصادك خلاص انهزم
وأفراحنا تدبل نجيلك تبدل همومنا لسعادة وتمحي الألم


2- يسوع إنت تقدر .. تعينني في ضعفي
وللفخ تكسر .. يارب البشر
ما دمت إنت سيدي .. لوعدك هاتوفي
هاتمسك بإيدي .. في وقت الخطر

1- ربنا طول عمرك عينه عليك مسؤول عنك بيفكر فيك
بيحبك جداً مشغول بيك حضنه مدفيك دايماً من البرد


القرار - وإن جيت للحق إن جيت للجد إلهنا محبته ملهاش حد
وزي الفادي ما تلقاش حد مراحمه كتيرة وما بتتعد


2- لو تبعد عنه بيشتاق ليك قبل ما تنده له يكون حواليك
و بحبه وحنانه بيرويك زي المية ما بتروي الأرض
3- إمسك إيده هيمسك في إيديك أطلب منه هاتلقاه يغنيك
فوق جسر العالم هايعديك و هايمسح دمعك من عالخد
4- لو كنت ضعيف هو يقويك لو تعبان وحده اللي هايشفيك
يبني في قلبك بيت ويخليك حصن ومش ممكن يوم ينهد

1- أنا حين أفكر في الأمس أنا حينما أخلو إلى نفسي .. أتذكرها
صورٌ تتراءى لعينايَ وخطايايَّ وقت صبايا .. أتصورها

القرار - تُرهقني تُلاحقني الأفكار وأذوبُ من الخجلِ والعار
وأصلي إليك لترحمني وأقرعُ صدري كـالعشّار

2- أدعوكَ لتستلمَ فؤادي ولتمحو صفحات الماضي .. من ذاكرتي
قُل كلمة فيهدأ إعصاري واملأ بكلامِكَ أفكاري .. ومخيلتي

1- مش هننزل عينينا عن شخصك يا رحوم غير لو رضيت تقوم
وتترأف علينا وتشيل عنا الهموم تمسح دمع العيون

القرار - مرفوعة ليك عيوننا زي عيون العبيد وإنت يا إلهنا سيد وخليتنا ولادك
بمحبة بتعاملنا يا إلهنا يا مجيد وخلاصك مش بعيد يا قريب من ولادك

2- وكتير إحنا قاسينا وشبعنا من الهوان لكن آن الأوان
نلجألك يا فادينا وتدوقنا الحنان تملانا بالأمان

القرار - رحت الكنيسة عشان قالوا لي صاحبي مات
لاقيت صحابنا كلهم متجمعين
وفضلت أقول لو عمري مر قوام وفات
ومُتّ كنت هاروح لفين؟
1- بصيت على عيون اللي كانوا في الكنيسة وجدتهم
عيون حزينة الدمع نازل منهم
بعد الصلاة اتفرقوا وكل واحد راح طريق
في الدنيا ضاعوا تاهوا نسيوا كلهم
2- زعلنا حبة وبعد حبة نسينا كل اللي جرى
لكن هانعمل إيه لو إحنا يا ترى
كنا مكانه ملفوفين بقماش في صندوق من خشب
والتوبة دي متأجلة ومتأخرة؟

القرار - أنا اللي عارف أعمالك .. داري بحالك
فيه كلمة عايز أقولهالك .. ارجع لي وتوب
هاريحك من أحمالك .. وهاشيلهالك
معايا صخرة أحزانك .. تخلص وتدوب


1- مع الخطايا بتبيّت .. ليه متقيد؟
بالإسم حي لكن ميت .. مليان بذنوب
سكّت شرورك واسمعني .. قوم وارجعلي
سلم لي قلبك واتبعني .. وكفاية هروب
2- راحتك هنا بين أحضاني .. عود من تاني
عشان سايبني بتعاني .. عايش مرعوب
سامعني بانده وسايبني .. ارجع يا ابني
صدقني بعدك يتعبني .. يا غالي ومحبوب
3- معايا تقدر تتعلم .. لو تتألم
في عز ألمك هاترنم .. ليه تعيش مغلوب؟
لكل آهه ودمعاية .. تلقى نهاية
وتنتصر وانت معايا .. على أي حروب