ناقصني حاجة (17 ترنيمة )

1-(أشرق يا شمس البر نور عتمتي
واوهب من تاني لموتي حياة
كاسر قيود الزيف لحقيقة دنيتي
باقدم كياني ذبيحة حية للإله)2

القرار- (وأنا هايم بين التسبيحات
وبتفيض جوايا البركات
تتشكل فيَّ الهتافات
لحروف منطوقة بالصلوات)2

2-(فاتح بيباني ادخل ليك الأمتلاك
وأروي حياتي من ماء الأرتواء
ليلي وصباحي مالوش وجود إلا برضاك
وكنزي الحقيقي ياربي عندك في السما)2

3-(افرد جناحك كالمظلة وقت شمسي
وضلل على نفسي تهدى تستريح
تغفل عينيَّ بلمسة الحنان لقلبي
وأدوب وأنا ما بين كفوف المسيح)2

4-(باشعر كأني في لُقاء روحي معاك
إنّي بجناح العز طاير في أرتفاع
وبهاء المجد الخارج من سماك
بألاته يعزف وقلبي في خشوع الأستماع )2

(تقول يهوذا يكتبوا في الخيانة ديوان
بزيف الوش ويا الغش يتحكموا بسلطان)2
(وتوب البر اللي لابسينه مالوش معنى
ده كم من يهوذا في ضمائرهم لكن ما يبان!)2

1- (خليني ثابت مهما جه إبليس وزوّد إغراءاته
خليني رافض كل فكرة زيف وغش في تلميحاته)2
(أنا باعترف أني بضعفي مِلت له وسمعت ليه
وبقِلة الإيمان قِبلت أرجع وأكون لعبة في إيديه)2
(وهي قِلة حيلة مني وجاي محتاجك تعينني)2
من فخاخه انتشلني وفوِّت الفرصة عليه وخليني ثابت

2- (خليني ثابت ده فخ اتنصب واتجهزت شباكه ليَّ
خليني رافض من البداية لا لأحضان الخطية)2
(أنا مش هاعود مهما يعود إبليس ويزرع ليَّ خوف
ولا هانحني مهما يقول لي مُرَّة عيشتك والظروف)2
(طول ما انت معايا هاقدر أرفض الإغراء وأعبر)2
هي عيشة هي أكتر أبقى ثابت مهما أشوف خليني ثابت

(يارب يا أبو الغلابة أدي الغلابة كتير
والدنيا صبحت غابة والفقراء بالقناطير)2
والظلم شد في عوده والمظلومين أنواع
فيهم مكسور الجناح واللي نفسه يطير

1-(مهتم تجيني في أتعابي وفي وقت الضيق
وتكون لي سحابة تظللني طول الطريق)2
(ترشد خطاويَّ في ليالي بعمود من نور
وتقول لي اطمن ما تخافشي العدو مأسور)2
في بحيرة نار سايبه بيصرخ زي الغريق

القرار- (هاتخاف من إيه؟ هاتخاف من إيه؟
ده العالم كله في إيديَّ ومِتحكم فيه)2

2-(أنا عيني بتغفل وتنام لكن انت لا
وأنا المخلوق اللي ما يُذكَر و انت الإله)2
(تتنازل دايماً وتجيني وقت الخطر
ويجف النهر لكن بالقى في كفك مطر)2
وأنا باسمع صوتك بيقول لي أنا ليك حياة

3-(وأنا شايف الظُلم بيتشطَّر وبيجهز لي
تهمس في وداني وبقوة ربي تقول لي)2
(ولا حاكم يقدر يتحكم أبداً في مصير
أنا بس اللي باقوله هايمشي هو اللي يصير)2
إيه ممكن يوم يا ابني هايحصل غصب عني؟

(عمال تداري في عيوبك برتوش ألوان
وكل مرة بتدّارى خايف لتبان!)2
لسان جميل بيتكلم والفعل مافيش
والفرصة لو ضاعت منك (انت الغلطان)2

1-(لما تحس بضعف وضيق والقلب يبات مجروح
يبقى الخوف زي الإنسان بيطاردك فين ما تروح)2
(ولما تشوف المية بعينك وبرضو تبات عطشان
وعقلك يتعب م التفكير وتبكي حزين حيران)2

القرار- (ربك هيحلها ربك هيحلها
مهما تصعب عليك ربك هيحلها)2

2-(لما الشمس تدفي الدنيا وأنت في عز البرد
وتتغطى بأوهام اللمة ومافيش جنبك حد)2
(ولما تحس بحزن حقيقي ومافيش دمع بجد
وتشعر إن نهاية الدنيا جاية في أقرب وقت)2

3-(لما بتتغيّر أحلامك وتقودك لسراب
وتقول أنا من أهلي وناسي وأنت من الأغراب)2
(وفي نهاية تقرب توصل فجأة أتقفل الباب
ولما بتفشل كل حلولك وسط طوفان أتعاب)2

(يا عم يا فلاح اصحى قبل النهار ما يفوت
هامل الأرض ونايم والزرع نشفان بيموت)2
و آدي الخريف هالل و رياحه قوية
ولو الثمار ماتت هاتخدها الرياح وتفوت

القرار- (بمجد سماوي بنعلي اسمك يا إلهنا للأبد
بمجد سماوي قلبي ها يهتف طول ما على الأرض أتوجد)2

1-(ويشق النور العتمة تهرب مننا
وإبليس يخاف لما يشوفك وسطنا)2
(وبالحمد فوق الشفتين نعلن خضوع)2
لإله خلاصنا وتاج رؤوسنا وعزنا

2-(قلبك يحاوط ع القلوب التعبانين
ترجع بفرح تروي كل العطشانين)2
(والروح تروح مأسورة للمسة إيديك)2
وتلبد في حضنك ملجأ كل الحيرانين

3-(إيدك تطبطب على اللي ضاع منه الأمل
تفتح له كل باب على حلمه أتقفل)2
(وتفرد جناحك كالمظلة النفس تهدى)2
تبدل الرتوش لمشهد مكتمل

(يا أبو جناح مكسور ودموع على خدك
ليه تنطوي للريح و تهون عليك نفسك)2
(لو تفضل راسك تفضل في التراب تندفن
ولو شبيت هاتقدر تعبر تعبر جسور ضعفك)2

القرار- (أنا بانحني قدامك وأسجد ربي لجلالك)2
ما انت الملك وحدك والسلطان سلطانك

1-(ما في قوة قدام قوتك كل شيء في إيديك
ولا سلطة قدام سلطتك الكل خاضع ليك)2
ولا راس تقدر ترتفع ولا صوت يعلا ويتسمع
والخوف يخاف ويرتجع ويسود ربي سلامك
2-(ما في كلمة قدام كلمتك وحدك ليك القرار
ولا حيلة تقدر تخدعك كاشف الأسرار)2
ولا حاكم ظالم راح يحكم وبظلمه وسلطان يتحكم
قدام مجدك يصبح أبكم غير ضعفه والإنكسار

(شجري من غير ثمار والأوراق ماتشبعشي
وشكيت كتير للناس والناس ماتنفعشي)2
وقلوب كتير ممدودة وأحضان كفوفها شوك
وقلوب قليلة تحن لكن مابتدومشي

1-(افتح بيبانك للنور للحياة
اعلن إيمانك بالرب الإله)2
(ثبت رجائك على فرح السما)2
(ابدأ في رحلة حب تعيش للمُنتهى)2
2-(افتح بيبانك يدخل ملك الملوك
يهزم ممالك يطرد اللي هانوك)2
(ويشيل أحمالك اللي ياما حَنوك)2
(تخرج مرفوع الراس وإيديك في إيدين أبوك)2
3-(افتح بيبانك يحيا فيك اللي مات
تبدل أهاتك بنغم الترنيمات)2
(تعلّي بهتاف المجد كل التسبيحات)2
(تشبع النفس الحية بفيض الإحسانات)2
4- (افتح بيبانك تتهدّم الأسوار
تملك أراضي وتعيش الانتصار)2
(ده من نور الشمس الليلة هيهل النهار)2
(يهزم ليالي الأسر وسنين الانكسار)2
5-)افتح بيبانك افرح مع الفرحين
جدد ألحانك إبليس يخرج حزين)2
(وخد مكانك ما بين المؤمنين)2
(في موكب النصرة وهتاف الغالبين)2

(ياللي انت تحت حمول وبينحني ضهرك
ارفع عينيك عينيك لفوق في رب منتظرك)2
(تُلقي عليه الأحمال والهم ويا الضيق)2
ده هو وحده اللي يقدر يشيل الحمول عنك

القرار- (جمع صلواتك يا مروح في غُنى وتسبيح
ما هي غربة ولازم هاتعدي في اسم المسيح)2

1- (وجبال الشر المليانة هم وأتعاب
تندك بهتافات النصرة لرب الأرباب)2
والحلم معاه يبقى حقيقي ونعبر ونشوف
بعيون تتفتح على مجده في مشهد مكشوف

2- (نلبس أجساد تانية جديدة بنسيج من نور
نتحرر من نسج ترابي بيتعب ويخور)2
وترتاح النفس الشقيانة في رحلة حياة
بدأت في الأرض العطشانة لحضن الإله

3- (ندخل لديارنا الأبدية بأجمل ألحان
ودي رحلة عظيمة يثبتنا فيها الإيمان)2
وكتير العدو فيها بيحاول يزرع في شكوك
والمؤمن غالب وغيره عبد ومملوك

(يا مقدسة قومي ما تكدريش بالك
حط الإيدين ع الخد ما ينصلح حالك)2
(لو جت قلوب الناس اتحولت لحجارة
الرب عنده العون وتملي على بابك)2

في لحظة صدق ما بين الحق وعيوب مش متشافة
في لحظة ندم زيف انكشف وصارعت شعوري بالحاجة
ساكن في قلبي الجرح مانع ليالي الفرح عن روحي
عافرت كتير مع همي يخف شوية يرحمني من نوحي
وأنا في طريق الجهل ماشي و باقول على المهل يا جروحي
قدام مراية الحق القلب دق من خوفي
وانكشف قد إيه جوايا ضلمة وضلها على توبي
وأتاريني في حلم الكمال عايش ولا حاجة
ولا في شيء بيشبع نفسي والحاجة
ده كله انكشف مافيش مداري جوايا ولا حاجة
لكنّي صحيت، لكنّي صحيت على حقيقة وليها نفسي محتاجة
في لحظة ما شبّ الحق النور شق طريق العتمة جوايا
ف جاي اعترف وأنا باعترف ناقصني حاجة