إيهاب فايز (8 ترنيمة )

(يا عم يا فلاح اصحى قبل النهار ما يفوت
هامل الأرض ونايم والزرع نشفان بيموت)2
و آدي الخريف هالل و رياحه قوية
ولو الثمار ماتت هاتخدها الرياح وتفوت

(عمال تداري في عيوبك برتوش ألوان
وكل مرة بتدّارى خايف لتبان!)2
لسان جميل بيتكلم والفعل مافيش
والفرصة لو ضاعت منك (انت الغلطان)2

(تقول يهوذا يكتبوا في الخيانة ديوان
بزيف الوش ويا الغش يتحكموا بسلطان)2
(وتوب البر اللي لابسينه مالوش معنى
ده كم من يهوذا في ضمائرهم لكن ما يبان!)2

(ياللي انت تحت حمول وبينحني ضهرك
ارفع عينيك عينيك لفوق في رب منتظرك)2
(تُلقي عليه الأحمال والهم ويا الضيق)2
ده هو وحده اللي يقدر يشيل الحمول عنك

(يا أبو جناح مكسور ودموع على خدك
ليه تنطوي للريح و تهون عليك نفسك)2
(لو تفضل راسك تفضل في التراب تندفن
ولو شبيت هاتقدر تعبر تعبر جسور ضعفك)2

(يارب يا أبو الغلابة أدي الغلابة كتير
والدنيا صبحت غابة والفقراء بالقناطير)2
والظلم شد في عوده والمظلومين أنواع
فيهم مكسور الجناح واللي نفسه يطير

(يا مقدسة قومي ما تكدريش بالك
حط الإيدين ع الخد ما ينصلح حالك)2
(لو جت قلوب الناس اتحولت لحجارة
الرب عنده العون وتملي على بابك)2

(شجري من غير ثمار والأوراق ماتشبعشي
وشكيت كتير للناس والناس ماتنفعشي)2
وقلوب كتير ممدودة وأحضان كفوفها شوك
وقلوب قليلة تحن لكن مابتدومشي