وحيد زكي (28 ترنيمة )

القرار - وأنا وياك .. وأنت معايا بتهون الدنيا ويهون شقايا
ساعتها بس بقول كفاية مش عايز حاجة غيرك معايا
أنت يا رب عليَّ كفايا
1- وأنا وياك بحس براحة مبحسهاش مع الإنسان
وأنت معايا بكل صراحة بلاقي الطيبة والأمان
2- وانت معايا مطمن قلبي طول ما أنا حاسس إنك جنبي
وهخاف من إيه وانت يا ربي حافظ نفسي .. رفيقي في دربي
3- وأنا وياك بنسى همومي بنسى مشاكل أمسي ويومي
وألاقيني إني فرحان بغني والعالم كله مش بيسعني
4- عمري ما يوم أبداً حسيت إني لوحدي .. إني وحيد
دايماً جنبي يا رب معايا خطوة بخطوة الإيد في الإيد

إحنا كورال ملاك الذبيحة ليل ونهار وبكلمة صريحة
جينا نرنم بقلوبنا الجريحة كلمات بسيطة لكن مريحة
ونقول لملاكنا يقول لفادينا يرحمنا ويقبل مننا الذبيحة
شفنا ملاكنا بسيف من نار حارس ذبيحة إله جبار
شايفينك ملاكنا بين الشموع بعيوننا الغريقة في بحر الدموع
شكراً شكراً يا ملاكنا وصل وصل رسالتنا

1- يا خالق وواجد ومُبدع ف خلقك .. ما أعظم عمايلك في كل خلايقك
يا قلب المحبة، إيدين الأطبة .. برعايته وحنانه وأمنه وضمانه
أنشأ وعلّم وكبّر وربى
القرار - بيقولوا في السما والسما كلها مش أدك .. يا حد البحور ولا شيئ يقدر يحِدَّك
يا صانع وبارع، يا غارس وزارع .. مغطي الخليقة ببهاءك ومجدك
لا قبلك يا رب كان، ولا باقي حد بعدك
2- يا راسم خطوطي، وناسج خيوطي .. مكون عظامي وملامحي وصوتي
يا واهب حياتي، يا مركب نجاتي .. يا ملجأ لنفسي، مرسايا وشطوطي
تصرخ لمجدك الحجارة ف سكوتي

3- يا رافع بقوة الأكوان التقيلة .. معلقها في الفضا مع إنها شيلة
إيديك يا رب تصنع آيات ومعجزات .. قوات فوق استيعابنا وعجايب مُستحيلة
تشهدلك أعمالك والطبيعة الجميلة
4- يا شمس الشموس، يا حلم العروس .. يا شهوة الروح وعشق النفوس
أتاري إللي عرفك حقيقي وحبك .. وجرب وداقك قرر يدوس
ع العالم برجله ولا تغريه الفلوس

1- أنا مشغول لكن مش بيك .. نفسي يا إلهي تشغلني
وأفضل على طول أفكر فيك .. ولا عنك حاجة تعطلني
وأعمل وأقول إللي يرضيك .. عشان انت بجد إللي هاممني
القرار - اربطني بيك .. ثبتني فيك .. خلي اشتياق القلب ليك
خليني عايش مستنيك .. نسيني روحي ولا أبقى ناسيك
2- بقى معقول أفرّط فيك ؟! وانت إللي في ضعفي مكملني !!
دا أنا ما صدقت يارب ألاقيك .. ولا هاسيبك مهما قابلني
هفضل متبت قوي في إيديك .. لحد الملكوت ما تدخلني
3- ماتسيبنيش أضيع روحي .. وأبكي ولا تنفعني دموع
بدّل أحلامي وطموحي .. إللي في الأرض مزروع
خلي قلبي وعقلي وروحي .. طايرين ويا بخور وشموع

القرار - آه لو تعرف إيه إحساسي لما عشانك كنت بقاسي
علي الصليب المر سقوني كنت ولسة بسببك أقاسي
1- بص لتاج الشوك علي راسي شايف يا ابني إزاي كان قاسي
شوف بصعوبة إزاي أنفاسي من مسمار مغروس
2- حط صباعك جوه في جنبي تلقى الحربة جرحت قلبي
من الكرباج متقطع ضهري وعشانك يا ابني كان صلبي
3- كل دا يا إبني عليّ يهون خزي وعار ودمع عيون
إلا قساوتك والجحود أصعب من جنبي المطعون

راجع يا ربي وندمان راجع من بعد الشرود
جايلك ومحمل أحزان وخطايا من غير حدود
جايلك يا أبويا وعطشان طمعان في كل الوعود
أخطيت يا أبويا يا حنان آسف علي كل الجحود
يا نفسي كوني مستعدة كوني دايماً في انتظار
اسهري وصلي بدوع واوصلي الليل بالنهار
شهلي وهمي الرجوع ابكي دمع حرقة ومرار
سلمي قلبك ليسوع دوقي حياة الانتصار
إغسلني يا ربي بدموعي طهرني من الخطايا
إرحمني واقبل رجوعي شددني ثبت خطايا
أدبني يا أبويا برحمتك بسياط حب وحنين
مشيني معاك في سكتك وافضل جنبي معين

أنا مالي يا نفسي بغيري مين خاطي ومين غلطان
قوم اصحى وفوق يا ضميري لا أنا ربه ولا ديان
خليني في نفسي في حالي ما كفاية أنا أهو غرقان
ودايماً خليها في بالي إللي بيدين يُدان
كل واحد فينا عنده من الخطايا إللي يسد عينه
كل واحد فينا عنده من الخطايا إللي يسد عينه
يبقى ليه أصلاً يا نفسي آجي علي غيري وأدينه؟!
من ستر الله عليَّ وحنانه وحبه ليَّ
قافل عيون الناس مش شايفين إللي بيَّ
خطايا وعيوب كتيرة وذنوب مُرة ومريرة
دايماً ساتر عليَّ دايماً ساتر عليَّ
مش أد زعلك يا ربي مش أد زعلك يا ربي
أخطيت أرجوك سامحني بحنانك أدبني وربي

يا رب كتير في ناس .. لسة مش عارفينك !!
أو قطعوا من الأساس .. كل صلة بينهم وبينك
ومازلت علينا بتصبر .. شارق ع الكل شمسك
مرضى القساوة إحنا .. ودوانا يا رب لمسك
العمر عقد اتفرط .. حباته ما يتلموش
ضيعناه في الغلط .. وحد غيرنا ما بنلوموش
لو باقي حتى كام .. سنين شهور أيام
أرجوك سامحنا عشان .. يبقى لنا عندك مكان
إحنا ولادك يا رب .. وعدلك مليان بحنان
يا رب الشر زاد .. وبنصرخ انت فينك ؟!
أسرى إحنا في استعباد .. أسيادنا ألف غيرك !!
ومازلت لينا بتُعذُر .. غافر ذنوبنا بدمك
وعلينا ياما بتُستُر .. عشان خلاصنا يهمك
إلحقنا قبل الغرق .. في بحر آخر ملوش
جربنا كل الطرق .. لكن ما بيوصلوش !!
لو باقي مِنّا حُطام .. تحيي رميم العظام
وتقوم إللي مات .. زي لعازر ما قام
بمراحمك يا رب .. مش بخطايا الإنسان

أنا في الحقيقة يا رب مستغرب .. حكاية ميلادك للخيال أقرب !!
معقولة ترضى تييجي وتتولد .. زي البشر كدة عادي، بستغرب !!
يا إلهي انت يا إله الضعفاء/البسطاء .. اخترت بنت يتيمة عظيمة في النقاء
وحليت بروحك فيها من بين النساء .. انت الوحيد المولود من عذراء !!
كنتي أمه يا عدرا كنتي دايماً معاه .. انتي الوحيدة إللي سمح لها إنها ترعاه
بتعلميه وهو إللي أصلاً بيعلِّم!! حيّر شيوخ وكان لسة يادوب في صباه !!
وانتِ يا مريم حيرتي عقول الناس .. بالعفة والطهارة إللي أغلى من الماس
تستاهلي وبجدارة تكوني أم الإله .. وتسمعي في البشارة إنك فخر الأجناس

مش بالسنين والشهور والأيام .. تقدر تحسب تقول أنا عمري كام
هي مش حبة حروف وحسبة أرقام .. دي لحظة حياة حقيقية تساوي ألف عام
مين قال إن السنين هي عمرك إللي عشته ؟! عمرك هيطلع كام لو منه الضايع حوشته ؟!
وياما ضاع منك سنين عدت وكإنك .. شايل بين كفوفك مية وبتقع منك !!
لا يا صاحبي وصديقي دا عمرك الحقيقي .. إللي تقدر تقول محسوب
هو إللي بعيد بتعيشه عن فكرك وطيشه .. من يوم ما نويت تتوب
وعرفت إللي انت نسيته ومن قلبك حبيته .. يبتدي عمرك يا دوب
وتقول كان فين ويا ريته عرفني الطريق ومشيته .. وبقيت من الخراف محسوب
أنا عمري إللي معاك يا رب، يوم ما سكنت أنت القلب
يوم ما عرفتك بجد، وابتدى قلبي يحب
أما العمر إللي قبلك إللي كان قبل ما أقابلك .. كان أخره ضياع وهلاك
ولو انكشفت الحقايق يطلع عمري دقايق .. إللي فيها كنت معاك !!