ماجد عادل (13 ترنيمة )

١- يسوعي أشكرك يا ربي
إنت اتولدت عشاني أشكرك يا ربي
مافهمتش إزاي أعظم ملك في الدنيا دي
يطلع من قصره الكبير
ويسكن في مزود صغير

القرار- إزاي ماقبلش الحب ده.. وأعيش بعيد عنك كده
باجي لك عند مزودك.. اقبلني في يوم ميلادك
ميلادك في قلبي أنا.. إدي لحياتي معنى
خلاني ابن للملك.. اقبل حياتي بين إيديك

٢- يسوعي أشكرك يا ربي
إنت اتولدت عشاني أشكرك يا ربي
هل ترضى تيجي تسكن في قلبي
تيجي تشرف حياتي
ويبقى ميلاد يسوع في قلبي

شايفك حزين ده أنت كنت مالي الجو كلام ومرح
شايفك تعيس كان كل الناس حواليك حاسين بفرح
مين اللي قال إن الدنيا وريتلك وشها التاني
إيه اللي جرى الأيام الصعبة جت وبديت تعاني
نفسي ترجع تغني
ألحان.. أنغام.. مش أشجان وقلق منام
مش أحزان وأوهام غني.. غني
الكلام الحلو هايفضل له معاني
ولحنك الجميل هايرجع من تاني غني.. غني
من الكلام والألحان تعمل أغاني غني.. غني.. غني

أشكرك يا الله لاستجابتك الصلاة أشكرك يا الله
أشكرك يا الله لاستجابتك الصلاة أشكرك يا الله
١- أنت الصالح والأمين تحفظ وعدك للبنين
بارفع اسمك بالترنيم ومديون ليك طول السنين
٢- كل يوم أقضيه معاك أطلب مجدك ورضاك
وأنت تسد الاحتياج ده ما فيش أكتر من غناك

١- أنت إله قدوس وبتكره الخطية
وإحنا كنا بندوس ع النعمة الغنية
بعدنا عن الحياة وخرجنا من ديارك دورنا على المياه
وهي في آبارك
اخلق فينا قلب جديد

القرار _ نفوسنا ترجع لك وصلاتنا نرفع لك بتوبة حقيقية وقلوب مستنية
الوقت الآن مقبول عشان نقف ونقول: ارحمنا من الخطية واخلق فينا قلب جديد

٢- إيديك مفتوحين بتقول أنا باحفظ وعدي
وإحنا إليك راجعين قبل ما الوقت يعدي
بنرجع عن طرقنا وبنطلب وجهك من جديد
يشرق على حياتنا ويكون اليوم ده لينا عيد
اخلق فينا قلب جديد

أنا عايز أعيش صح مع إخواتي مع جيراني
مع أصحابي وأقول للغلط لأ أنا مصري وعايش صح

القرار- أنا باسبح الفادي.. وبارفع ليه الأيادي
كل الخليقة بتنادي.. وبتشهد عنك يا فادي
وأنا طول ما عندي حياة.. أنا هاتبعك يا الله
وأنا طول ما عندي لسان.. هاسبحك يا الله

١- عندك ملايكة وجنود.. وصوتهم يملا ويزيد
لكنك عايز تسمعني.. هو أنا صوتي هايفيد

٢- وأنا صوتي أصبح له قيمة.. بتسبيح ربي الكريم
من يوم ما خلص حياتي.. وأنا عايش عمري ترنيم

إنت قدوس.. إنت عظيم إنت الإله ورب الحياة
وأنا محتاج إليك قلبي عطشان إليك
وأنا مقدرش أعيش إلا إيدي في إيديك

تتكلم بالأحلام بالرؤيا وفي المنام
تشفي كذا الأجساد والروح من السقام
اجعلنا نراك بالإيمان كي لا يفوتنا الزمان
أمانتك ياربي لجيل بعد جيل
كل يوم نشهد قوة الإنجيل
كلامك كل الحق ليس فيه تبديل
وعملك في القلوب هو لنا الدليل
قد ضاعت الأيام بحثًا وراء أوهام
لا نبغي جيلاً من بشر لن يبرأ من آثام
نجاتنا بالمسيح الآن إذ فيه وحده الضمان

ناس بتصدق وناس تتشكك .. ناس تتقدم وناس مِنتظرة
مِنتظرة دليل إنه إله قدير يشوفوه بالعين يلمِسوه بالإيد
وأنا مش مستني أُبصر يدك ولا مستني ألمس جرحك
أنا عارف إنك مُت بذنبي من قساوة قلبي
ناس مش عايزة الله موجود وناس مش عايزة العقل موجود
ووقت الألم كلهم بيجروا على كيان أعظم يعدِّي السدود

اسمعوا مني الرواية قصة حياة مسيحي
وهي دي الحقيقة هانغني اللحن تاني وتاني
يسوع مولود عشاني في حضن العذراء مريم
أنا شايفه عند شط المية والصيادين أهية
ودول هايبقوا التلاميذ تلاميذ المسيح
وفي أورشليم نشوف ناس رافعة السعوف
بتهلل بالهتاف للملك العظيم بيصلي
في جسيماني بالبكا ويعاني وشال عني أحزاني
وجه حكم بيلاطس وصلبه كان بقسوة
لكنه قام بنصرة من الأموات.. مجداً هللويا
قام بنصرة على الخطية وكان خلاصه هدية
ومسيحنا فاتح إيده ليك والدعوة بيعيدها عليك
اقبله وقول آمين قول معانا آمين