رامز إسحاق (11 ترنيمة )

1- (ما أقدرش أعيشها إلا لما
رضاك يكون لي فيها الهوا
أتنفسه ويحيا قلبي
زي اللي عطشان وأرتوى)2

القرار- (هي الحياة من غير وجودك
جوة قلبي تسوى إيه
ما هي الحياة أصلًا بجودك
وخيرك اللي مغرقني فيه)2

2-(ما أعرفش أعيشها باللي عرفته
من رحلتي جوة طريقها
ده كل يوم فيها الجديد
مش عارفه غير اللي خالقها)2
3-(مش عايز أعيشها مسلوب إرادة
زي ورقة في وسط ريح
تاخد قراري وأرضى وأسلم
ولا حتى قادر أصرخ وأصيح)2
4-(أنا عايز أعيشها خدامك أنت
ويوم مجيئك أشتهي
أصل اللي باقي فيها يا دوب
أيام قليلة وتنتهي)2

1- (وسط ظروف البلد الدايرة.. رايحة لفين أهي ماشية وسايرة
كل الناس قلقانة وحايرة..وأنامتصان فيها ومتطمِّن)2

القرار- (أنامتصان فيها ومتطمِّن.. أصل إلهي عليها مهيمن
يحصل مهما هايحصل فيها..أنا متشال في عينيه ومتأمِّن)2

2- (أخبارقتل وموت وجريمة.. والأمان بقى موضة قديمة
والإنسان أصبح بلاقيمة..وأنا بدم يسوع متمِّن)2

3- (ضربة من ضرباته زمان.. صارت الضلمة في مكان
وبيوت شعبه في نوروأمان..قلبه على شعبه بيتحنِّن)2

4- (مين يمسكها ومين يرأسها.. لوحتىه ايعيد تأسيسها
مش هاشغل بالي ولا أدرسها..ولاهافضل أفكروأخمِّن)2

5- (هو بإيده ماسك الدفة.. وماعندوش أحداث بالصدفة
مهماعدوالخيريتخفى..الترتيب من فوق متزمِّن)2
6- (هو نوري وخلاصي ليَّ.. هوحصني في طول ليالي
مين يؤذيني ويقوى عليَّ..لوحتى فيه لاكي يفنِّن)2

7- (يعزل ملوك وينصب غيرها.. والأزمنة هو يغيرها
لو قال كلمة مين يكسرها..واللي يفكر يبقى اتجنِّن)2

8- (بلدي مباركة ده صوته ووعده..وقت الضيق هايعدي وبعده
جاي المجد بفرحة وسعده..اللي مصدِّق وعده يأمِّن)2

1- (ماتتذمرش على الحالة وع الصحة اللي أنت فيها
ماتتذمرش دي ياما ناس وسط المرض مش بتلاقيها)2

القرار- (ارفع عينيك لفوق قول له يارب أشكرك
والحالة لو بتسوء ما تخليهاش تكسرك
صحي إيمانك فوق خلي الإيمان ينصرك ماتتذمرش)2

2-(ماتتذمرش لما تلاقي الاِحتياج سايب مرارة
ماتتذمرش الله أمين بيرعى أولاده بمهارة)2
3-(ماتتذمرش على حال بلادك مها كان فيها ظلام
ماتتذمرش اقبل وصلي اطلب لها يسود السلام)2

1-(رجايا فيك ياللي فديتني وصار خلاصي أكيد
فكيت قيود استعبدتني واديتني قلب جديد)2

القرار- (رجايا فيك من قبل ما أقابلك ورجايا خاب في الحياة
وخلاصي بيك وقيودي اتفكت ومكاني بقى في السما)2رجايا فيك

2-(رجايا فيك ياللي شفيتني فكيت ليَّ القيود
وعاداتي اللي استعبدتني تهرب ولا بتعود)2
3-(رجايا فيك ياللي اشتريتني بدم غالي ثمين
حملت عاري وشلت عني أصبحت ليَّ معين)2
4-(رجايا فيك ياللي ضامن لي رحلة حياة لسماك
ده أنا في السما هافضل أملّي عينيَّ من رؤياك)2

١- أيام زمان جانا المسيح على أرضنا
عشان يبين محبته لكل البشر
والناس قالتله يا يسوع خليك هنا
وهما هما فكرهم ملاه الشر

٢- قبضوا عليه وراحوا بيه للحاكم اللي كان في البلد
أمر بضربه وحكم بصلبه ده غير كمان إنه اتجلد (٢)

القرار:
هانقدم تسبيحات للي من السما جانا
ده يسوع بدالنا مات وعلى الصليب فدانا (٢)
وعلى الصليب فدانا

٣- أخدوه الجنود علشان خلاص هايصلبوه
مع إن ملقوش في حياته أي عيب
هاينفذوا الحكم فيه وهايموتوه
ده الحكم بالموت وقتها كان الصليب

٤- وصل المكان ومعاه كمان لصين هايتصلبوا هناك
وهناك لقى التريقة ملك وتاجه من الأشواك

٥- وعلقوه على الصليب بالمسامير
وقالوله لو تقدر يا ريت تنزلنا
وهو كان يقدر لأنه إله قدير
لكنه كان عايز يموت من أجلنا

٦- عدت ساعات بعديها مات بعد ما كمل الخلاص
واللي يآمن هايبقى ضامن إن الخطايا غُفرت خلاص (٢)

١- (قصة من زمان قديم قالها يسوع واضحة وصريحة
عن واحد من أورشليم كان نازل رايح لأريحا)٢
(وهو مسافر تحصل حاجة طلعوا عليه حبة حرامية
ضربوه وأخدوا كل حاجة وفلوسه حتى الجلابية)٢

القرار
(هافضل أسبح رب المجد علشان هو إله رحيم
يفرح لما بنرحم بعض وفرحه فينا بيكون عظيم)٢

٢- (جريوا وهربوا بعد العلقة أصلها كانت علقة موت
وسابوا صاحبنا مدلوق دلقة مش طالع منه ولا صوت)٢
(وبعد شوية كاهن عدّى لكن شافه وما ساعدوش
وواحد لاوي شافه وهدّا راح ماشي كأنه ما شافوش)٢
٣-(والمرة دي عدّى عليه سامري فعلاً كان صالح
اتحنِّن وفِضِل يداويه من غير ما يفكر في مصالح)٢
(وعلى حماره أخده وجابه لأقرب فندق كان في طريقه
ودفع عنه كل حسابه وكأنه صاحبه وصديقه)٢

في يوم من الأيام
كان يسوع قاعد في بيت
بيقول ليهم أحلى كلام
كان بيعلم بالحواديت
والناس زحمة لحد الباب
والطريق ليسوع مقفول
جه وقتها أربع أصحاب
ومعاهم صاحب مشلول

القرار
باشكر ربنا على أصحابي
اللي معايا وبيحبوني
علشان همَّ كمان أحبابي
لما أحتاجهم بيساعدوني

حاولوا يخشوا وما عرفوش
من الزحمة الدخول ممنوع
طلعوا السطح وما اتكسفوش
حفروا حفرة من فوق يسوع
نزّلوا واحدة واحدة صاحبهم
قدام يسوع علشان يشفيه
ويسوع شاف فيهم إيمانهم
راح شفاه من اللي فيه
والراجل قام واتنطط
أصل جسمه ما بقاش ضعيف
روّح فرحان ومزقطط
شايل سريره اللي كان خفيف
ناس كتير كانت ومذهولة
وفضلوا يسبحوا ربنا
مستغربة بتقول "معقولة؟!"
دي أول مرة تحصلنا

١- في حكاية حصلت مع بطرس بدأت قبل صلب المسيح
قاله يسوع إنت تنكرني ٣ مرات والديك هايصيح
راح بطرس قاله بشجاعة مش ممكن أنكر معرفتك
أهون عندي إني أموت ولا قول إني عمري ما شفتك

القرار- (وحده يسوع يغفر خطايانا ويملانا بسلامه
منسبحه علشان خلانا أولاده وخدامه)٢

٢- ولما جم قبضوا على يسوع بطرس والتلاميذ راحوا هربوا
لكن بطرس كان بيراقبه بس وهو بعيد مش جنبه
بعد شوية واحدة قالتله إنت كنت قريب ليه
در عليها بصوت متوتر أنا مش عارف بتقولي إيه

٣- مرة كمان قاعد بيتدفى وحدة قالتله إنت معاه
رده كان أنا ماعرفهوش علشان خاف ياخدوه وياه
وكمان مرة ناس كانوا جنبه قالولوا لغتك كاشفاك
فابتدى يحلف ماعرفهوش وساعتها الديك صاح هناك

٤- بعد ما بكى بطرس ندمان ويسوع مات وبقوته مات
راح قابل بطرس مبسوط وعاتبه عتاب بأحلى كلام
وغفرله إنكاره ليه وطلب منه يرجع يخدم
ده اللي بيعمله لينا يسوع للي يتوب من قلبه يندم

١- المسيح شبّه ملكوته بعشر عذارى فرحانين
علشان هايقابلوا العريس ومصابيحهم مليانين
خمسة منهم حكيمات أخدوا زيت تاني توفيه
والخمسة الباقيين جاهلات قالوا اللي معانا كافيه

القرار- (هاسبحك وأمجدك حتى ولو عيني مش شايفاك
مستنيك وأعليك لحد ما تيجي تاخدني معاك)٢

٢- العريس كان لسه ما جاش والعذارى راحوا ناموا
في نص الليل قالوا ده جاي فالعشرة بسرعة قاموا
والجاهلات قالوا للحكيمات مصابيحنا بدأت تطفي
ادونا زيت فقالولهم صعب اللي معانا مش هايكفي

٣- راحوا الجاهلات يشتروا زيت والعريس جيه بالترحاب
والحكيمات علشان جاهزين دخلوا معاه واتقفل الباب
والجاهلات رجعوا بيقولوا افتحولنا الباب ندخل
فالعريس قال ماعرفكوش كنتوا جهزتوا من الأول

١- ده يسوع قال للتلاميذ قمت
كذبة إنه يمشوا بالمركب
لكن بعد الوقت ما مر
لقيوا الجو ابتدا يتكركب
والليل جيه والبحر ده هاج
والمركب من جوه اتبل
والريح شدت والأمواج
والتلاميذ مش لاقيين حل

القرار- (ده يسوع هو وحده بيقدر
هانسبحه رغم الظروف
عنا مش ممكن يتأخر
لما بنطلبه وقت الخوف)٢

٢- بعد شوية قرب الفجر
والحال لسه نفس الحال
جه يسوع ماشي عالبحر
لما شافوه قالوا ده خيال
صرخوا من الخوف غصب عنهم
أصل ده رعب محدش شافه
ويسوع كلمهم طمنهم
قال ليهم أنا هو لا تخافوا)٢

٣- بطرس قاله لو إنت هو
أأمرني أجيلك عالمية
قله تعال فحس بقوة
وابتدى يمشي شوية شوية
لكن خاف من الريح حواليه
فغرق وصرخ قبل نزوله
ويسوع راح ماسك بإيديه
ودخلوا المركب قاموا سجدوله