مزاميرو 4 (25 ترنيمة )

باحبه أكتر كل ي – و – م باحبه أكتر كل ي – و - م
هو فاديَّ – هو راعيَّ باحبه أكتر كل ي – و - م
باحبه أكتر كل ي – و – م باحبه أكتر كل ي – و - م
عشان أمثاله – ومعجزاته باحبه أكتر كل ي – و - م
أنا باحب ي – س – و – ع أنا باسبح ي – س – و - ع
أنا باطيع ي – س – و – ع باحبه أكتر كل ي – و – م
ي – س – و – ع باحب ي – س – و – ع
باسبح ي – س – و - ع باطيع ي – س – و – ع
باحبه أكتر كل ي – و – م باحبه أكتر كل ي – و - م
هو فاديَّ – هو راعيَّ باحبه أكتر كل ي – و - م
باحبه أكتر كل ي – و – م باحبه أكتر كل ي – و - م
عشان أمثاله – ومعجزاته باحبه أكتر كل ي – و - م

لما كان يسوع صغير كان عايش في الجليل)
كان ليه أصحاب زينا القصير والطويل
بيلاعبوا وبيتكعبلوا مع بعض زينا
بيضحكوا ويتعلموا مع بعض أحلى كلام) ٢

زي ما يسوع كان بيكبر)
أنا كمان عايز أكبر
في الحكمة والقامة والنعمة
لما عيش زي حياته
خطوة بخطوة ورا خطواته
واللي هتكبرني الكلمة)٢

كان يسوع ولد مطيع وبيقول حاضر على طول)
بيساعد دايماً مامته من قبل ما تطلب وتقول
وحبة حبة يكبر حبة
وبقى يساعد كل الناس
يشفي الضرير يدي الفقير
أصل قلبه مليان إحساس)٢

١- (قصة من زمان قديم قالها يسوع واضحة وصريحة
عن واحد من أورشليم كان نازل رايح لأريحا)٢
(وهو مسافر تحصل حاجة طلعوا عليه حبة حرامية
ضربوه وأخدوا كل حاجة وفلوسه حتى الجلابية)٢

القرار
(هافضل أسبح رب المجد علشان هو إله رحيم
يفرح لما بنرحم بعض وفرحه فينا بيكون عظيم)٢

٢- (جريوا وهربوا بعد العلقة أصلها كانت علقة موت
وسابوا صاحبنا مدلوق دلقة مش طالع منه ولا صوت)٢
(وبعد شوية كاهن عدّى لكن شافه وما ساعدوش
وواحد لاوي شافه وهدّا راح ماشي كأنه ما شافوش)٢
٣-(والمرة دي عدّى عليه سامري فعلاً كان صالح
اتحنِّن وفِضِل يداويه من غير ما يفكر في مصالح)٢
(وعلى حماره أخده وجابه لأقرب فندق كان في طريقه
ودفع عنه كل حسابه وكأنه صاحبه وصديقه)٢

١- (خمستلاف راجل وعياله وكمان ستات
مع يسوع فوق الجبل بيسمعوا
وكله مشغول بصاحب المعجزات
وقت الغدا عصافير البطن صوصوا)٢
ومفيش الأكل اللي يكفي علشان يشبعوا

٢- (المكان مفيهوش غير سمكتين وخمس خبزات
مع ولد إداهم ليسوع يمكن ينفعوا
والكل بيسأل هيكفوا إزاي آلافات
يسوع شكر وتلاميذه وزعوا)٢
وبعد ما الناس شبعوا اتناشر سلة اتملوا

٣- (باسبحك ده ليك إنت بقدم ربي الموهبة
تقبلها يا يسوع وتبارك وبتعمل بيها معجزة)2

(يسوع زي عادته كان معاه ناس كتير
بتحب تسمع لكلامه أصله حلو وليه تأثير)٢

(جاله رئيس المجمع مكان العبادة زمان
راجل اسمه يايرس سجد له وكان قلقان)٢

(هاسبح ربي عشان في حزني هو حاسسني
وليه عالموت سلطان لما أندهله بينقذني)٢

(بنته كانت عيانة والوقت عمال يفوت
راح وقال ليسوع تعال الحقها لأحسن هاتموت)٢

(وافق وراح معاه والزحام كان شديد
جاله واحد قاله دي بنتك ماتت أكيد)٢

(قاله يسوع ما تخافشي وخلي عندك إيمان
وصل معاه ولقى في البيت الحزن مالي المكان)٢

(ويسوع دخل أوضتها مع أبوها وأمها
أمرها تقوم فقامت وطلب يدوها أكلها)٢

كانت حوالي الساعة ستة والكل قاعدين في البيوت
لكن واحدة ليها خطة إنها تخرج وقت السكوت
خارجة رايحة تملا مية من بير أبونا يعقوب
متدارية علشان خاطية وسلوكها ده مش محبوب
في الكتاب اتكتبت قصتها علشان منها نتعلم
والسامرية دي شهرتها غيَّرها أعظم معلم

هاسبح ليك يلي قابلني بكل ما فيَّ
هاسبح ليك ياللي بتغفر كل خطية
هاسبح ليك بكلامك غيَّرت حياتي
هاسبح ليك وهاكلم عنك إخواتي

ويسوع كان عند البير اللي راحتله السامرية
واتفاجئت بطلب خطير عايز يشرب من المية
واليهود والسامريين مش بينهم أي معاملة
ردت عليه بكلمتين لو عندك جردل املا
بص وقال لو تعرفيني كنتي طلبتي مني المية
باديها للي بيجيني تجري فيه أنهار حية

وفضل يتكلم من قلبه ويقولها على حكايتها
وهي عمالة تجاوبه ومعاه حست براحتها
عرفها إن العبادة لازم تكون بالروح والحق
مش كلام كله إعادة لكن أكون في الله بالزق
عرفت إنه مش حد عادي ده اللي هايفدي الجموع
خرجت تشهد وتنادي تعالوا شوفوا يسوع

في يوم من الأيام
كان يسوع قاعد في بيت
بيقول ليهم أحلى كلام
كان بيعلم بالحواديت
والناس زحمة لحد الباب
والطريق ليسوع مقفول
جه وقتها أربع أصحاب
ومعاهم صاحب مشلول

القرار
باشكر ربنا على أصحابي
اللي معايا وبيحبوني
علشان همَّ كمان أحبابي
لما أحتاجهم بيساعدوني

حاولوا يخشوا وما عرفوش
من الزحمة الدخول ممنوع
طلعوا السطح وما اتكسفوش
حفروا حفرة من فوق يسوع
نزّلوا واحدة واحدة صاحبهم
قدام يسوع علشان يشفيه
ويسوع شاف فيهم إيمانهم
راح شفاه من اللي فيه
والراجل قام واتنطط
أصل جسمه ما بقاش ضعيف
روّح فرحان ومزقطط
شايل سريره اللي كان خفيف
ناس كتير كانت ومذهولة
وفضلوا يسبحوا ربنا
مستغربة بتقول "معقولة؟!"
دي أول مرة تحصلنا

مرة واحد أعمى قاعد يستعطي من الناس
وبيطلب يحنّوا عليه ويعطوه فضة ونحاس
يمر اليوم زي اللي قبليه
ضلمة وحزن مافيش مين يداويه
(كان سامع عن يسوع إنه شفى من الجموع)2
من الناس اللي حواليه
واتمنى يشوف الرب ويمر من جنبيه
واتمنى يشوفه الرب ويفتّح له عينيه
راح اليوم وجه اليوم ومر جمع غفير يمشوا من حواليه
راح اليوم وجه اليوم اللـي فات جــنبيه اللي هايفتحله عينيه
(وصرخ قال يا ابن داود ارحمني)٢
قال له يسوع روح إيمانك قد شفاك
والأعمى قد أبصر وتبع الرب هناك
مرة واحد أعمى قاعد يستعطي من الناس
ومر يسوع بين الجموع وشفى بارتيماوس

١- كان في تسع رجالة غيري
عندنا مرض اسمه البرص
عايزين علاج .... ومفيش علاج
قولنا ضاعت كل الفرص
من بعيد شُفنا يسوع
رحنا صرخنا وقولنا ارحمنا
رد وقال روحوا للكهنة
وإحنا رايحين قام طهرنا

القرار
هاشكر ربي في كل وقت
مش هانسى اللي عمله عشاني
لما صرخت إليه وندهت
طهرني من تعبي شفاني

٢-ولما لقيت نفسي اتشفيت
قلت أرجع من غير ما أفكر
ماعندي حاجة ....دي اقل حاجة
إني أجيله أسجد وأشكر
سأل وقال فين الباقيين
ليه مرجعوش تاني معاك
أنت الغريب وأنت اللي جيت
علشان كده غُفرت خطاياك

كان في رجل عنده ولدين
عايشين معاه وفي خيره فرحانين
وفي يوم من الأيام الابن الصغيّر
حاجات كتير جواه بدأت تتغيّر
طلب من أبوه كل نصيبه عشان يمشي بعيد ويسيبه
وسافر لبلد بعيدة وبقى عنده أصحاب جديدة
وبعدين؟
فجأة لما خلص ماله محدش حتى سأل ماله
ما لقاش غير شغلٌ حقير إنه يرعى شوية خنازير
طب ما فكرش يرجع لباباه؟
فكَّر كتير في نفسه وقال من الصعب من المحال
إني أفضل أعيش هنا وأنا مع بابا كنت في هنا
هاقوم وأرجع لبابا وأقوله سامحني يا أحلى بابا
أنا كنت غلطان وسبتك اقبلني أعيش عبد عندك
وباباه عمل إيه؟
شافه الأب من بعيد جري عليه وقلبه سعيد
أخذه في حضنه بدون تفكير غيرله شكله خلاه أمير
ياه يا رب أنا بشكرك
(يارب أنا باشكرك وجاي أسبحك
علشان برغم غلطي حاببني ولما باتوب دايماً تقبلني)٢
زي الابن الضال

١- أنا كنت حمار قاعد في حظيرة ماليش لازمة وقاعد في حيرة
نفسي أعمل حاجة جديدة بس حاجة تبقى مفيدة
وفي يوم وأنا باكل برسيم لاقيت اتنين رجالة داخلين
قالوا لسيدي حمارك عايزين لشخص مهم إحنا محتاجين
ولاقيت شعب كثير وجموع بيقولوا أوصانا ليسوع
وسعف وورد كتير مرشوش كله فرحان ووجهه بشوش
عرفت ساعتها إن الشخص ده هو يسوع
اللي هايفدي الناس ويخلص الجموع

القرار:
مجداً (٣) ليسوع مخلصنا
مجداً (٣) ليسوع فادينا
مجداً (٣) ليسوع راعينا
مجداً (٣) نرفع ليه أغانينا (٢)

١- أيام زمان جانا المسيح على أرضنا
عشان يبين محبته لكل البشر
والناس قالتله يا يسوع خليك هنا
وهما هما فكرهم ملاه الشر

٢- قبضوا عليه وراحوا بيه للحاكم اللي كان في البلد
أمر بضربه وحكم بصلبه ده غير كمان إنه اتجلد (٢)

القرار:
هانقدم تسبيحات للي من السما جانا
ده يسوع بدالنا مات وعلى الصليب فدانا (٢)
وعلى الصليب فدانا

٣- أخدوه الجنود علشان خلاص هايصلبوه
مع إن ملقوش في حياته أي عيب
هاينفذوا الحكم فيه وهايموتوه
ده الحكم بالموت وقتها كان الصليب

٤- وصل المكان ومعاه كمان لصين هايتصلبوا هناك
وهناك لقى التريقة ملك وتاجه من الأشواك

٥- وعلقوه على الصليب بالمسامير
وقالوله لو تقدر يا ريت تنزلنا
وهو كان يقدر لأنه إله قدير
لكنه كان عايز يموت من أجلنا

٦- عدت ساعات بعديها مات بعد ما كمل الخلاص
واللي يآمن هايبقى ضامن إن الخطايا غُفرت خلاص (٢)

١- مريم المجدلية كانت دايمًا تمشي ورا يسوع
بعد ما شفاها من الخطية ومن قيود إبليس
حرر ناس كتير وكمان أشبع الجموع
كل العيانين كانوا بيتشفوا من غير تمييز
أول لما عرفت إنه عشانها مات
راحت مع أصحابها يوم الحد بدري
ولما وصلوا القبر كان الحزن زاد
مش لاقيين يسوع والحراس بتجري
نزل ملاك الرب ودحرج الحجر

القرار:
خريستوس آنستي – آليثوس آنستي (٢)
بقيامة الرب يسوع أخدنا النصرة على الخطية
خريستوس آنستي – آليثوس آنستي (٢)
هانسبح اسمه بصوت مسموع
للي ادانا حياة أبدية (٢)


٢- بطرس ويوحنا دخلوا القبر بسرعة ومالقوهوش
طلعوا محتارين لسه مش عارفين هو فين
قعدت مريم تبكي، فجأة شافت شخص ماتعرفوش
كانت فكراه جنايني، قال لها: بتدوري على مين؟
وده كان الرب يسوع بنفسه اللي قام
راح ندالها باسمها وقال: يا مريم
عرفت صوته اللي كان مليان سلام
فرحت جدًا إنه حي وردت: يا معلم
جريت تهتف بقيامته وتفرح البشر