ريمون ظريف (18 ترنيمة )

1- (تن تن تن .. تن تن تن
صوت جرس المدرسة بيرنْ)2
منه بنعرف إن إلهنا
إله نظام مش زيطه و زن
(خلق الكون في 6 أيام
في التالت من موته قام
بقيامته ادّى الإنسان
يدخل للفردوس فرحان)2
2- (تن تن تن .. تن تن تن
صوت جرس الكنيسة بيرن)2
منه بنعرف إن إيماننا
روح ونظام وعقيدة وفن
(كل الكون بنظام متقسم
واحنا كمان لازم نتعلم
إن حياتنا راح تتقدم
لو مشيت بنظام وبفن)2

القرار –(بيسألوني أصحابي ليه إنت مختلف
فيك حاجة مش عادية والكل معترف)2
1- (لو شفت في يوم خصام فرق وسط الصحاب
تدخل وتكون سلام وتجمعهم قوام)2
(يا صحابي صدقوني إيماني هو الأساس
أصل يسوع حبيبي علمني أحب الناس)2
2- (لو يوم كان الطريق مليان أشواك وضيق
في سلام قلبك يعيش وياك أعظم رفيق)2
(يا صحابي صدقوني إلهي هو الأساس
قلبي يفرح بوجوده وبروحه باكون حساس)2

القرار- (فيه واحد بيحبك بيخبَّط على قلبك
خليه يملك عمرك وأفتح قلبك ليه
كلمّه تلقاه سامعَك حاسس بيك و بضعفك
هو الخالق ربك شايلك جوه عينيه)2

1-(يفرح لو تنادي له لو تقرا إنجيله
من قلبك صلي له وأرمي الحمل عليه
لو حسيت بالوحدة وتألمت بشدة
ربك صوته بينده روح اتعرف بيه)2
2-(ربنا وعده أكيد لو يبقى لك سيد
يديك عُمر جديد و الشر هَايمحيه
ليه تايه متغرب؟ ليه من حبه بتهرب؟
ليه من الدنيا بتشرب؟ شبعك موجود فيه)2
3-(تحتار ليه وتستغرب؟ حاول بس وجرب
روح للفادي وقرَّب جرحك راح يشفيه
روح أوصف له ظروفك عجزك وسنين خوفك
جوه الضَلمة يشوفك ويشيلك بإيديه)2

1- (دعوا الأولاد يأتون إليَّ عندي لهم بركات
لأن لمثل هؤلاء ملكوت السماوات)2

القرار - رب المجد قال.. رب المجد قال قال إيه؟
(ي س و ع بيحب الأطفال)2

2- (و احنا كمان بنحبه لأنه فدانا على الصليب
وسفك دمه الطاهر عنا وهو أعز حبيب)2
3- (يسوع بيفرح لما نصلي ولما نكون خاضعين
لكلام بابا وماما و يفرح لما نكون هاديين)2

1- غيرت اغسطين الفاجر حوِّلته إلى قديس طاهر
حوِّلت ماريا القبطية من سيرتها الشيطانية
(بمسيرة حلوة ملائكية في عيشة نُسك سماوية)2
غيرت اغسطين الفاجر.. (حوِّلته إلى قديس طاهر)2
2- حوِّلت كمان موسى الأسود اللي كانت هيئته ترعب
إلى قديس طيِّب متواضع قلبه أبيض نوره ساطع
(صاحب قدرة لا نهائية بتحب خلاص البشرية)2
حوِّلت كمان موسى الأسود.. (اللي كانت هيئته ترعب)2
3- يا ربي يا للي اتولتهم بالنعمة وغيَّرت حياتهم
هم وكتير جداً غيرهم تحريرهم تم وتبريرهم
(أرجوك أرجوك اتولاني حوِّلني إلى إنسان تاني)2
يا ربي يا للي اتولتهم.. (بالنعمة وغيَّرت حياتهم)2
4- سامحني وبالعطف أشملني ولصورة بهية حوِّلني
إنساني أتحرر من شره ومشي بهمة في طريق بره
(طرح الماضي بكل سواده وفي درب النور ماشي جهاده)2
سامحني وبالعطف أشملني.. (ولصورة بهية حوِّلني)2

قشة وقشة سابوا العشة راحوا لمزود مش مشهور)
بكوا وانكسروا لما افتكروا أبداً مش هايجيلهم دور)2
بس في ليلة جميلة عجيبة سابوا الضلمة وشافوا النور
شاف القش يسوع متجسد نونو في المزود محطوط)
قام واتنطط نام واتبطط علشان يبقى سرير مظبوط)2
فرش وعرش ومين كان يدري إن الفرح عليه هايدور
أصل يسوع دايماً بيدور على اللي حزين والناس ناسياه
واللي مفكر إنه مِكسر ومافيش أبداً فايدة معاه
يّجي بذاته يسوع في حياته تصبح غالية وحلوة معاه)2)

1- (مين غيرك بيحن عليَّ لما بكون تعبان
مين غيرك أنت ومين يتراءف مع ضعفي كإنسان)2
القرار –(مين مين)4
(مين غيرك يا يسوع مين )2
2- (مين غيرك يسمع أناتي قبل ما أقولها كلام
مين غيرك أنت ومين يرفعني ويملا القلب سلام)2
3-(مين غيرك كان واقف جنبي يوم ما احتاجت أمان
مين غيرك أنت ومين طمني ومن يومها أنا فرحان)2

القرار – (هارمي كل اتكالي عليك وعلى كلامك هارمي الشبكة
كل حياتي مِلك إيديك إيد مين غيرك تدّي البركة؟)2

1- (أنا سلمتك كل حياتي وباقول دايماً تبقى مشيئتك
أصل أنا حتى بقلبي الخاطي جربت حنانك وعرفتك)2
2- (كل يقيني إن انت معايا واثق في اللي بتختاره ليَّ
ما انت في ضعفي تبقى حماية وطريق الخير ترسمه ليَّ)2
3- (قلبي بيصرخ لك وينادي إنك تقبل تدخل بيتي
وإن كنت أنا بعتك في الماضي بارك انت عمري الآتي)2

القرار - (لما لمست قلبي الميت فيَّ قام .. وأمّا لمست توبك زالت كل الآلام)2

1- (رغم الجراح رغم الأنين
رغم الخطية الساكنة فيَّ من سنين)2
(جاي بإيمان جاي بيقين
إنك هاتتحَنن وتشفي قلبي الحزين)2
2- (عِشت بآثام أيام كتير
كان ذنبي سجني اللي كنت جواه أسير)2
(وندايَّ ليك أملي الأخير
اسمع يا ربي صوت ضعيف إنسان فقير)2
3- (الضعف كان مالي الكيان
لكني راجع بارمي نفسي بين إيديك
(محتاج أمان لمسة حنان
محتاج أقولك ع اللي فيَّ وأشكي ليك)2

1- زي طفل جميل وصغير قاعد يسمع لك يا يسوع
قدم خبزاته وسمكاته لما جاعت الجموع
أصل حبك جوه في قلبه خلاه يمشي وراك ما يجوع
نفسي كمان أنا كل حياتي اتبع خطواتك يا يسوع
2- زكا قصيَّر خالص خالص كان نفسه يشوفك يا يسوع
فكَّر يطلع فوق الشجرة نط بسرعة على الفروع
أصل حبك جوه في قلبه خلاه دايماً بيك مرفوع
نفسي كمان أنا كل حياتي اتبع خطواتك يا يسوع
3- متَّى في شغله مشغول جداً يضرب يقسم في المجموع
نظرة عينك خطفت قلبه قام وياك على طول يا يسوع
أصل حبك جوه في قلبه صوتك جواه كان مسموع
نفسي كمان أنا كل حياتي اتبع خطواتك يا يسوع