نانسي كرمى (6 ترنيمة )

١- كان في تسع رجالة غيري
عندنا مرض اسمه البرص
عايزين علاج .... ومفيش علاج
قولنا ضاعت كل الفرص
من بعيد شُفنا يسوع
رحنا صرخنا وقولنا ارحمنا
رد وقال روحوا للكهنة
وإحنا رايحين قام طهرنا

القرار
هاشكر ربي في كل وقت
مش هانسى اللي عمله عشاني
لما صرخت إليه وندهت
طهرني من تعبي شفاني

٢-ولما لقيت نفسي اتشفيت
قلت أرجع من غير ما أفكر
ماعندي حاجة ....دي اقل حاجة
إني أجيله أسجد وأشكر
سأل وقال فين الباقيين
ليه مرجعوش تاني معاك
أنت الغريب وأنت اللي جيت
علشان كده غُفرت خطاياك

كانت حوالي الساعة ستة والكل قاعدين في البيوت
لكن واحدة ليها خطة إنها تخرج وقت السكوت
خارجة رايحة تملا مية من بير أبونا يعقوب
متدارية علشان خاطية وسلوكها ده مش محبوب
في الكتاب اتكتبت قصتها علشان منها نتعلم
والسامرية دي شهرتها غيَّرها أعظم معلم

هاسبح ليك يلي قابلني بكل ما فيَّ
هاسبح ليك ياللي بتغفر كل خطية
هاسبح ليك بكلامك غيَّرت حياتي
هاسبح ليك وهاكلم عنك إخواتي

ويسوع كان عند البير اللي راحتله السامرية
واتفاجئت بطلب خطير عايز يشرب من المية
واليهود والسامريين مش بينهم أي معاملة
ردت عليه بكلمتين لو عندك جردل املا
بص وقال لو تعرفيني كنتي طلبتي مني المية
باديها للي بيجيني تجري فيه أنهار حية

وفضل يتكلم من قلبه ويقولها على حكايتها
وهي عمالة تجاوبه ومعاه حست براحتها
عرفها إن العبادة لازم تكون بالروح والحق
مش كلام كله إعادة لكن أكون في الله بالزق
عرفت إنه مش حد عادي ده اللي هايفدي الجموع
خرجت تشهد وتنادي تعالوا شوفوا يسوع

لما كان يسوع صغير كان عايش في الجليل)
كان ليه أصحاب زينا القصير والطويل
بيلاعبوا وبيتكعبلوا مع بعض زينا
بيضحكوا ويتعلموا مع بعض أحلى كلام) ٢

زي ما يسوع كان بيكبر)
أنا كمان عايز أكبر
في الحكمة والقامة والنعمة
لما عيش زي حياته
خطوة بخطوة ورا خطواته
واللي هتكبرني الكلمة)٢

كان يسوع ولد مطيع وبيقول حاضر على طول)
بيساعد دايماً مامته من قبل ما تطلب وتقول
وحبة حبة يكبر حبة
وبقى يساعد كل الناس
يشفي الضرير يدي الفقير
أصل قلبه مليان إحساس)٢

١- من زمان القصة دي بتتحكى
عن واحد قصير واسمه زكا
كانت شغلانته رئيس للعشارين
بيلم ضرايب لكن أزيد حبتين
ودي فلوس أكتر بكتير من حقه
ومحدش خالص كان يقدر يفتح بوقه
وسمع عن يسوع وكل أعماله
كان نفسو يشوفو فساب الشغل وجاله

القرار- (أنا طول الوقت هاغني وأسبح
ليك يا بو قلب كبير بيسامح
لما بتوبتي أجيلك تفرح
وبتغفرلي اليوم ومبارح)٢

٢- وسط الزحمة مكنش شايفه زكا
عمال بيدور على أي سكة
وفي راسه نطت حتة فكرة لذيذة
يروح يشوفه من على الجميزة
ويسوع شافه راح ندهله وقله
عايز أدخل بيتك ف زكا بسرع نزله
وكانوا الناس واقفين ومتدايقين
علشان زكا خاطي من الوحشين

٣- أتكلم زكا وكل الناس سامعين
أنا نص فلوسي هاديها للمساكين
واللي ظلمته وكان مني بيخاف
هاديله حقه لكن أربع أضعاف
فقال يسوع حصل خلاص للبيت
وده السبب اللي عشانه جيت
علشان يسوع كان بيهمه الناس
بيقرب منه ويديها الخلاص

١- قرية صغيرة اسمها بيت عنيا فيها عيلة من ٣ إخوات
هم لعازر ومرثا ومريم عدوا في أصعب الأوقات
وبعتوا رسالة ليسوع تعال عشان أخونا عيان
بس يسوع اتأخر حبة علشان مجد الله هايبان

القرار- ليك عالموت سلطان والمستحيل عندك ممكن
هانسبح ليك مهما كان لحد ما في سماك نسكن

٢- مات لعازر صاحب يسوع وجوه القبر هناك دفنوه
وقفلوا القبر بحجر كبير وبأحزان ودموع ودّعوه
ويسوع جيه في اليوم الرابع سمعت مرثا فجريت عليه
قالتله لو إنت جيت من بدري ماكنش هايحصل اللي إحنا فيه

٣- وبعد شوية مريم راحت وسجدت عند رجلين يسوع
وقالت ليه نفس كلام مرثا وقعدت تبكي بالدموع
ويسوع بكا قدام الناس وسألهم فين دفنتوه
ولما راحوا عند القبر شاف الحجر وقال ارفعوه

٤- وقالت مرثا باستغراب ليه ٤ أيام مدفون
رد يسوع عليها وقال آمني وهاتشوفي إيه هايكون
ويسوع صرخ وقال لعازر اخرج من القبر حالاً الآن
وفيه ناس آمنت بعد ما شافت والعيلة رجعوا البيت في سلام

١- ادى زمان قوي يسوع أمثال منها مثل الخروف الضال
(قصة راعي كان بيراعي كل خروف في عينيه متشال)٢
كان بيرعى ١٠٠ خروف وفي حضنه متدفيين
(يبص عليهم وقام يشوف لقاهم ٩٩)٢

القرار- (جايين بنسبح ونغني ليك علشان عايزنا نبقى قربك
لما بنبعد مانهنش عليك وترجعنا تاني لحضنك)٢

٢- دوّر عليه نفسه يلاقيه ومن بعيد لمحه بعينيه
(وعلى كتافه لما شافه شاله وكان فرحان قوي بيه)٢
وده بيحصل في السما لما وحد خاطي يتوب
(تتملي أفراح وغنا علشان اسمه بقا مكتوب)٢